Bir mınıstrlikten ekinshisine silteıdi: Senator týrızmdegi máseleni kóterdi
Senatordyń aıtýynsha, Balqash kóliniń jaǵasynda týrıstik-rekreatsııalyq demalys aımaǵynyń salynýy Jetisý oblysynyń qarqyndy damýyna yqpal etedi. Sonymen qatar 2022 jylǵy 20 qazanda Prezıdent óńirge sapary barysynda jurtshylyqpen kezdeskende týrızm salasyn damytýǵa erekshe mán berý qajettigin aıtty.
«Osy oraıda Balqash kóliniń jaǵasynda týrızmdi damytý maqsatynda óńirdiń tıisti ınjenerlik ınfraqurylymyn qamtamasyz etý talap etiledi. Ol úshin jobalaý-smetalyq qujattama ázirlendi. Jobalaý-smetalyq qujattamany ázirleýge jergilikti bıýdjetten 120 mln teńge bólindi. Jobanyń jalpy quny 4,9 mlrd teńgeni qurady», - dedi A. Tolamısov Senattyń jalpy otyrysynda Úkimet basshysynyń orynbasary Altaı Kólginovtiń atyna joldaǵan saýalynda.
Alaıda, bıýdjettik baǵdarlamalardyń ortalyq deńgeıdegi ákimshisi áli anyqtalǵan joq. Sebebi memlekettik organdar bir mınıstrlikten ekinshisine silteý arqyly oryndaý jaýapkershiligin óz moınyna alǵysy kelmeıdi.
«Sondyqtan osy máseleni tıimdi sheshý joldaryn qarastyryp, bıýdjettik baǵdarlamanyń ákimshisin anyqtap, jobany iske asyrýdy qoldaýyńyzdy suraımyn», - dedi senator.