Bir mezgilde kúı oryndaý chellendjine 1 mıllıonǵa jýyq bala qatysty

ASTANA. QazAqparat - Elimizdiń 7 myń bilim berý uıymynda bir mezgilde «Balbyraýyn», «Adaı» jáne «Saryarqa» kúıleri oryndaldy. QazAqparat bul týraly Oqý-aǵartý mınıstrligine silteme jasap habarlaıdy.

Mınıstrdiń aıtýynsha, mýzyka, ásirese dombyranyń áýezdi úni barlyq ulttardy jalpyadamı qundylyqtar – toleranttylyq, tózimdilik, birlikke úndep, bir arnaǵa toǵystyrady. Jáne óskeleń urpaqtyń óz tarıhy men ónerin úırenýge degen umtylysy men qyzyǵýshylyǵyn oıatady.

«Dombyra — mádenıetimizdiń negizgi sımvoldarynyń biri, ulttyq qundylyǵymyz. Bizdiń oqýshylarymyz, balabaqshanyń kishkentaı tárbıelenýshileri, kolledj stýdentteri ulttyq aspapta oınaýǵa belsendilik tanytqany qýantady. Búgin dombyranyń shanaǵynan tógilgen ún elimizdiń ár óńirinde áýeledi. Oqýshylar urpaqtan-urpaqqa jalǵasyp kele jatqan mádenı murany saqtap, odan ári jalǵastyrady dep senemin»,— dedi mınıstr Ǵanı Beısembaev.
Chellendj sońynda Oqý-aǵartý mınıstri elordadaǵy D. Qonaev atyndaǵy № 66 mektep-lıtseıiniń oqýshylarymen birge kúı oryndady. «Naýryz meıramy» merekelik estafetasyna 1 mıllıonǵa jýyq bala qatysty. Olardyń arasynda eń kishkentaıy – Batys Qazaqstan oblysy Terekti aýdany «Aqbota» balabaqshasynyń tárbıelenýshileri.
Eske salaıyq, búgin elordanyń barlyq bilim berý uıymynda astana ýaqyty boıynsha saǵat 12:00-de «Kúı kúmbiri» atty dombyrashylar chellendji ótti. Oǵan qalanyń 127 bilim berý mekemesinen 3 myńnan asa dombyrashy qatysty.