Bir mandatty jáne ózin-ózi usynǵandar arasynda báseke joǵary – Máýlen Áshimbaev

ASTANA. QazAqparat – QR Parlamenti Senatynyń tóraǵasy Máýlen Áshimbaev búgingi saılaýdyń ashyq ári ádil ótetindigine senim artty, dep habarlaıdy QazAqparat tilshisi.

«Búgin – mańyzdy kún. Májilis jáne máslıhattar depýtattarynyń saılaýy ótip jatyr. Saılaý – saıası reformalardyń bir bóligi jáne mańyzdy. Saıası naýqan jańarǵan zańnamanyń negizinde ótip jatyr. Byltyr referendým ótip Konstıtýtsııamyzǵa úlken ózgerister engizildi. Odan bólek, biraz zańdar qabyldandy. Bir mandatty okrýgten saılanýdyń engizilýi qoǵam tarapynan jaqsy qabyldanyp jatyr dep aıtýǵa negiz bar», - dedi Máýlen Áshimbaev saılaýda daýys bergen soń BAQ ókilderiniń saýalyna jaýap bere turyp.

Senat tóraǵasynyń aıtýynsha, bul jolǵy saılaýda joǵary belsendilik baıqalady.

«Saılaýda bir mandatty okrýgter kandıdattary jáne ózin-ózi usynǵandar arasynda báseke asa joǵary. Bul Memleket basshysy qabyldaǵan saıası reformalardyń ózektiligi men ýaqytyly ekendiginiń kórinisi. Májilis jáne máslıhattar depýtattary saılaýyn zań talaptary men halyqaralyq standarttarǵa sáıkes ótedi dep senemin. Búgingi naýqan barysyn halyqaralyq uıymdardyń baıqaýshylary qadaǵalap jatyr. Barshany saılaýda óz tańdaýyn jasaýǵa shaqyramyn. Bıliktiń qaınar kózi – halyq. Halyqtan joǵary eshkim tura almaıdy. Biz saılanǵan Májilis depýtattarymen qoıan-qoltyq jumys isteýge daıynbyz», - deıdi ol.

Buǵan deıin Senat tóraǵasynyń elordadaǵy №111 saılaý ýchaskede óz tańdaýyn jasaǵanyn habarlaǵan edik.