Bir lıtr sút - 14,5 mln teńge: Qyzylordada memlekettik satyp alýdaǵy keleńsizdikter anyqtaldy
Sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti qyzmetkerleri qoǵam belsendilerimen birlesip memlekettik satyp alýǵa baılanysty turaqty túrde monıtorıng júrgizip keledi. Ol memlekettik satyp alý baǵasyn jasandy kóterýmen baılanysty sybaılas jemqorlyq táýekelderin anyqtaýǵa múmkindik beredi.
Atalǵan shara barysynda Qarmaqshy aýdandyq № 275 orta mektebi memlekettik satyp alý portalynda 1 kúrtesheni 1 670 143 teńge kóleminde baǵalaǵan. Sol arqyly barlyǵy 208 767 875 teńgege 125 kúrteshe satyp alý josparlaǵan. Anyqtalǵan kemshilik boıynsha usynys joldandy. Nátıjesinde 1 kúrteniń baǵasy 16 701 teńgege deıin túsirilgen. Jalpy satyp alý sommasy 2 087 678 teńgeni qurady. Memleketke 206 680 197 teńge keri qaıtaryldy.
Sondaı-aq, Shıeli aýdandyq bilim bólimi 1 lıtr tabıǵı sútti 14 577 000 teńge satyp alýdy josparlaǵan. Nátıjıesinde josparly baǵasyn qaıta qaraý týraly usynys hat joldanyp, 1 lıtr tabıǵı súttiń baǵasy 223 teńgege túsirildi.
«Bıylǵy jyldyń 2 aıynyń qorytyndysymen 17 mekemege usynys joldandy. Nátıjıesinde jalpy sommasy 351 230 304 teńge únemdeldi. Atalǵan qarjylar bilim, densaýlyq jáne ózge de salalarǵa qatysty bolyp otyr», - dep málim etti departamentten.
Eske salsaq, budan buryn Qyzylordada qarjy basqarmasynyń is-áreketinen monopolııaǵa qarsy zańbuzýshylyq anyqtaldy.
https://kaz.inform.kz/news/kyzylordada-karzhy-baskarmasynyn-is-areketinen-monopoliyaga-karsy-zan-buzushylyk-anyktaldy_a3913467