Bir kúnde eki jerde gaz ballony jarylyp, adamdardy kúıik shaldy

ASTANA. QazAqparat – 5 qyrkúıekte eki óńirde gaz ballony jarylyp, 2 adam aýrýhanaǵa tústi, dep habarlaıdy QazAqparat Tótenshe jaǵdaılar mınıstrligine silteme jasap.

Túrkistan oblysy Ordabasy aýdanynyń Shubarsý aýylynda turmystyq gaz ballonyn paıdalaný kezinde redýktordyń durys jumys istemeýinen gaz-aýa qospasy jarylyp, 12 sharshy metr alańda úıdiń tóbesi men jıhaz órtendi. 2009 jyly týǵan qyz bala kúıik alyp, aýrýhanaǵa tústi.

Ekinshi oqıǵa Taraz qalasynda boldy. Gaz plıtasynyń durys jumys istemeýine baılanysty gaz-aýa qospasy jarylǵan. 1979 jylǵy áıel adam kúıik shalyp, aýrýhanaǵa jetkizildi.

Eki oqıǵa da gaz jabdyǵyn paıdalaný erejelerin buzý saldarynan bolǵan.

«Halyqty qaýipsizdik máselesine jaýapkershilikpen qaraýǵa shaqyramyz! Gaz jabdyǵyn ýaqtyly tekserip, jóndeý jumystaryn júrgizý qajet. Balalarǵa turmystyq gaz quraldaryn durys paıdalanýdy úıretińizder. Gaz ballondaryn tek mamandandyrylǵan uıymdarda toltyryńyzdar. Turmystyq gaz ballondaryn janarmaı quıý stantsııalarynda toltyrýǵa tyıym salynady», - dep eskertedi mınıstrlikten.