Bir kezderi muhıtqa shyǵar joly joq Qazaqstan búgingi tańda úsh muhıtqa birdeı ashyldy - N. Nazarbaev

ASTANA. QazAqparat - Bir kezderi muhıtqa shyǵar joly joq Qazaqstan búgingi tańda úsh muhıtqa birdeı ashyldy. Búgin Astanadaǵy Táýelsizdik saraıynda ótip jatqan Qazaq handyǵynyń 550 jyldyǵyna arnalaǵan Saltanatty shara barysynda sóz sóılegen QR Prezıdenti Nursultan Nazarbaev osylaı málimdedi.

«Babalarymyz mırac etken ulan-baıtaq dalamyz qanshalyqty keń bolsa da, Qazaqstanda uly muhıtqa shyǵatyn jol bolǵan emes. Bul bizge belgili bir qıyndyqtar týǵyzatyn edi. Temirjol ataýly Qazaqstannyń baılyǵyn tasý úshin tek qana bir baǵytqa - soltústikke qaraı salynǵan bolatyn. Al táýelsizdik jyldary biz jalpy uzyndyǵy 2500 shaqyrym temirjol salyp, elimizdiń barlyq oblystaryn bir-birimen baılanystyrdyq. Nátıjesinde Qazaqstannyń shoıyn joldary Qytaı arqyly Tynyq muhıtqa shyqty, Túrkimen arqyly, Parsy shyǵanaǵy arqyly Úndi muhıtyna shyqtyq, Reseı arqyly batys Eýropaǵa, odan ári Atlant muhıtyna jetetin boldyq. Buǵan qosymsha «Batys Qytaı-Batys Eýropa» Eýrazııalyq avtomagıstralin paıdalanýǵa berýge daıynbyz. Osylaısha Qazaqstan úsh muhıtqa birdeı ashyldy», - dedi N. Nazarbaev.

Budan bólek, Elbasy «Nurly jol» baǵdarlamasymen elimizde jańa 7 myń shaqyrymnan astam avtokólik joldary salynatynyn, barlyq óńirlerge baılanys 2-3 esege artatynyn jetkizdi.

«HHІ ǵasyrdyń naǵyz Jibek joly dep osyny aıtýymyz kerek», - dedi N. Nazarbaev.