Bir ǵana saýda jelisinde bes kúnde 550 tonna qant satylǵan

NUR-SULTAN. QazAqparat – Qazaqstanda qant baǵasyna ne áser etti jáne onyń baǵasy qalaı turaqtanady? Bul týraly QR Saýda jáne ıntegratsııa mınıstrligi saýda komıtetiniń tóraǵasy Erjan Qazanbaev túsindirdi, dep habarlaıdy QazAqparat tilshisi.

«Qantqa suranys kóbeıgen saıyn qant baǵasy ósip jatyr. Sońǵy málimetter boıynsha, bes kún ishinde «Magným» saýda jelisinde 540-550 tonna qant satylǵan. Buryn bes kúnde orta eseppen 170 tonna qant satylatyn. Qant baǵasy sol sebepti ósti. Jergilikti organdar Básekelestikti qorǵaý jáne damytý agenttigimen birlesip baǵany sebepsiz kótergen kásipkerlerdi tekserip, tıisti sharalar qoldana alady. Osy atalǵan sharalar qabyldanǵan soń baǵa turaqtaýy múmkin», - dedi E. Qazanbaev ortalyq kommýnıkatsııalar qyzmetinde ótken baspasóz máslıhatynda.

Aıta keteıik, saýda núktelerinde baǵany kóterý faktileri anyqtalsa, mynadaı keri baılanys arnalaryna habarlasqan jón: jergilikti atqarýshy organdar (ákimdikter), QR Saýda jáne ıntegratsııalar mınıstrligi tutynýshylar quqyǵyn qorǵaý komıtetiniń «e-Tutynushy» saıty, QR SIM saýda komıteti jáne QR Básekelestikti qorǵaý jáne damytý agenttigi.

Qazaqstanda shamamen 90 myń tonna qant qory bar jáne respýblıka qantpen tolyq qamtamasyz etilgen.