Bir de bir muqtaj bala «Qazaqstan halqyna» qorynyń kómeginen shet qalmaýy kerek – Toǵjanov

NUR-SULTAN. QazAqparat – QR Premer-Mınıstriniń orynbasary Eraly Toǵjanov Densaýlyq saqtaý mınıstrine «Qazaqstan halqyna» qory arqyly emdeletin balalardyń máselesin jeke baqylaýynda ustaýdy tapsyrdy, dep habarlaıdy QazAqparat tilshisi.

Vıtse-Premer mundaı tapsyrmany vedomstvonyń keńeıtilgen alqa otyrysynda berdi.

«Memleket basshysy Qasym-Jomart Kemeluly ótkende halyqtyń densaýlyǵyn saqtaýǵa, jalpy medıtsınalyq kómektiń sapasyn ári qaraı arttyrýǵa qatysty naqty tapsyrmalar berdi. Sonyń alǵashqysy – «Qazaqstan halqyna» qoǵamdyq-áleýmettik qory týraly. Qazir ol jerde biraz qarjy jınaldy. Sondyqtan biraz negizgi aýrýlarǵa baılanysty usynystardy qaraý kerek. Onyń ishinde orfan dertine shaldyqqan balalarǵa kómek kórsetý boıynsha aımaqtarǵa tapsyrma berildi», - dedi Úkimet basshysynyń orynbasary.

Sondaı-aq ol aýyr dertke shaldyqqan balalardyń qor qamqorlyǵynan tys qalmaýy kerektigin basa aıtty.

«Osy máseleni ákimdiktermen birge shuǵyl qadaǵalaýda ustaý kerek. Bir de bir bala dalada qalyp qoımaýy kerek. Ajar Ǵınııatqyzy, muny jeke baqylaýyńyzda ustaýdy suraımyz. Bir de bir bala qamqorlyqsyz qalmaýy kerek», - dedi Eraly Toǵjanov.