Bir-birin qaıtalaıdy: «SQ-Farmatsııa» basshysy memlekettik baǵdarlamalardy KPI arqyly retteýdi usyndy
BUSINESS TECHNOLOGY EXPO 2023 halyqaralyq kórmesiniń aıasynda ótip jatqan bıznes-forýmda bir-birin qaıtalaıtyn memlekettik baǵdarlamalar bar ekeni aıtyldy.
«Bıznesti memleket tarapynan qoldaýdyń shemalary shashyrańqy qalypqa engen. Qoldaý tetikteriniń KPI kórsetkishteri (tıimdilik kórsetkishteri – red.) bolý kerek. «Saýdany osynsha paıyzǵa, eksportty munsha paıyzǵa kóterýimiz kerek» deıtindeı ólshemderi bolýy tıis. Bıznesti qoldaýǵa baǵyttalǵan baǵdarlamalardyń bári osy kórsetkishterge baǵynyshty bolýy kerek. Qazir damý ınstıtýttarynyń arasynda báseke bar. Sonyń saldarynan keıbir baǵdarlamalar bir-birin qaıtalap otyr. Odan keıingi formaldy jumys shetke yǵystyrylýy kerek», - dedi Erhat Esqalıev.
Onyń paıymynsha, bıznestegi ózegi tereńde jatqan problemanyń biri – maman tapshylyǵy.
«Qazaqstan úshin kadr máselesi ózekti bolyp tur. Rezerv retinde qurylǵan júıelerdiń ózi birden jolǵa qoıylyp ketip jatqan joq. Osy jyldar ishinde kóp dúnıe istegen sııaqtymyz. Biraq problema jetkilikti. Mamandar, jas mamandar kerek. «Bolashaq» sııaqty júıe qalyptastyratyn ýaqyt kelgen shyǵar. Halyqaralyq kompanııalarda, ulttyq kompanııalarda taǵlymdamadan ótkizý máselesin jolǵa qoıý qajet edi. Bul jańashyldyq emes, tájirıbede bar. Sıngapýrda «talanttardy basqarý» modeli jumys isteıdi. Bizdegi otandyq kompanııalardyń kóbi ózine qajetti mamandardy osyndaı jolmen izdeıtinin bilem. Mysaly Air Astana bolashaq ushqyshtaryn mektep jasyndaǵy balalardyń arasynan iriktep júr. Kadr máselesin qazir klassıkalyq jolmen ǵana sheshý múmkin emes», - dedi ol.