Bir-birimizdi jerleý úshin emes, súıreý úshin báseke bolýy kerek - Serik Janbolat

ASTANA. QazAqparat - Qazaq saıttary arasyndaǵy básekelestikti kúsheıtý kerek. Onsyz zaman aǵymyna ilesý múmkin emes. Búgin qazaq saıttary redaktorlarynyń forýmynda alǵashqy sessııanyń moderatory, tanymal jýrnalıst Serik Janbolat osyndaı pikir bildirdi, dep xabarlaıdy QazAqparat tilshisi.

«Biz saıttyń texnologııasyn, aqparattyq texnologııalardy meńgermeıinshe saıtty damyta almaımyz. Búgingi zamanda kez kelgen adammen tikeleı baılanysýǵa bolatyn deńgeıge jetip otyrmyz. Al bizdiń qazaq saıttary osyny qatty qoldanyp jatqan joq. Jalpy, biz jańa texnologııalardy tolyǵymen qoldanyp jatqan joqpyz. Osyny ashyq aıtýymyz qajet. Men ózim bir nárseni durys kóremin. Qazaq jýrnalısteriniń ortasynda, qazaq saıttarynyń arasynda báseke bolsa ǵoı, shirkin. Básekeden qoryqpaý qajet. Álgi, bizdi básekeles dese, shalqamyzdan túsemiz ǵoı. Ondaı básekeles emes. Básekeles bolaıyq, biraq bir-birimizdi jerleý úshin emes, bir-birimizdi súıreý úshin...", - deıdi S.Janbolat.

Aıta keteıik, alǵashqy sessııada kontent pen oqyrman talaby máselesi talqylandy. Sol jerde «Minber» jýrnalısterdi qoldaý qorynyń jetekshisi Esengúl Kápqyzy qazaq saıttarynyń negizgi máselelerin atap ótti . Onyń aıtýynsha, qazaq tildi keńistikte qarjy-ekonomıkalyq materıaldar az. Al saıttardyń ózderi jeńil-jelpi taqyryptardan shyǵa almaı jatady.