«Bir beldeý - bir jol» bastamasynyń 2021 jylǵa deıingi strategııasyn ázirleý usynyldy

ASTANA. QazAqparat - 2021 jylǵa deıingi «Bir beldeý - bir jol» bastamasynyń strategııasyn ázirleý qajet. Mundaı usynysty búgin elordada ótip jatqan «Seriktestik: keden, salyq jáne bıznes» halyqaralyq forýmynda QHR Memleketkik salyq salý basqarmasynyń komıssary Van Tszıýn jasady, dep habarlaıdy QazAqparat tilshisi.

«Menińshe, biz negizgi úsh mindetke basa nazar aýdarýymyz qajet. Birinshisi - naqty maqsattarymyzdy aıqyndaý. Biz Jibek joly rýhyn, yntymaqtastyq pen ózara tıimdi qarym-qatynasty jalǵastyrýymyz qajet. «Bir beldeý - bir jol» bastamasynyń uzaqmerzimdi tetikterin qurý jáne olardyń tıimdiligin arttyrý esebinen barynsha keshendi ári alýan túrli salyqtyq yntymaqtastyqty qamtamasyz etýge tıispiz», - dedi ol.

Onyń atap ótýinshe, ekinshiden, aǵymdaǵy jyly ejelgi Jibek jolyn damytý jónindegi ekinshi forýmdy uıymdastyrý qajet. Bul rette tek qana saýda qaýymdastyǵynyń ǵana emes sonymen birge ǵylymı ortalardyń ózara is-qımylyn jolǵa qoıǵan jón.

«Jalpy, «Bir beldeý - bir jol» bastamasynyń 2021 jylǵa deıingi strategııasyn ázirleý kerek. Ol «Bir beldeý - bir jol» bastamasyna kiretin salyq ákimshileriniń arasyndaǵy tyǵyz yntymaqtastyqty odan ári jolǵa qoıýǵa septigin tıgizedi. Biz ózara is-qımyl tetikterimizdi standarttaýǵa tyrysqanymyz jón», - dedi Van Tszıýn.

Qytaı komıssarynyń atap ótýine qaraǵanda, aǵymdaǵy jyly QHR salyq salý salasyndaǵy yntymaqtastyqtyń negizin kúsheıtý maqsatynda ekijaqty 9 kelisimge túzetý engizýdi josparlap otyr.

«Úshinshiden, áleýetti arttyryp, talanttardy damytý kerek. Aǵymdaǵy jyly biz eksperttik pýlymyzdy kúsheıtý maqsatynda sáıkesinshe memleketterde salyq ofıtserlerimizdi is-saparǵa jiberýdi jalǵastyramyz. Salyq salý salasyndaǵy áleýetti arttyrý jónindegi 6 trenıng nemese oqytý is-sharasyn ótkizý josparymyzda bar», - dedi ol.