Bir aıdaǵy ınflıatsııa: Qańtarda qııar men pııaz aıtarlyqtaı qymbattady

ASTANA. QazAqparat - Bir aılyq mánde tutyný baǵalarynyń ındeksi 2023 jylǵy qańtarda 1,1% qurady. Ótken aıda azyq-túlik taýarlary – 1,4%, azyq-túlikke jatpaıtyn taýarlar – 0,9%, aqyly qyzmetter 0,7% ósti, dep habarlaıdy QazAqparat ulttyq statbıýroǵa silteme jasap.

Azyq-túlik taýarlary arasynda kókónis baǵasy aıtarlyqtaı ósken, qańtarda qııar – 22,4%, pııaz – 16,7%, qyzanaq – 8,8%, tátti burysh 6,5% qymbattady.

Baǵanyń ósýi kúrishke – 2,9%, untaq jarmasyna, jańa aýlanǵan nemese salqyndatylǵan balyqqa – 1,8%-dan, qara bıdaı-bıdaı nanyna, jumyrtqaǵa – 1,7%-dan, suly jarmasyna, shoshqa etine, aıranǵa – árqaısysyna 1,6%-dan, sondaı-aq taýyqtyń tós etine, sútke, tuzdy irimshikke, jemisterge, aýyz sýǵa da árqaısysyna 1,4%-dan tirkeldi.

Qumsheker 1,9% arzandady.

Azyq-túlikke jatpaıtyn taýarlardyń ishinde qańtarda baǵanyń eń kóp ósimi jýý jáne tazalaý quraldaryna baıqaldy.

Máselen, ótken aımen salystyrǵanda kir jýǵysh untaq – 3,9%, aǵartqyshtar – 3,5%, ydys jýýǵa arnalǵan quraldar – 3%, kir sabyn 2,7% ósti.

Turmystyq tehnıka baǵasy, kerisinshe, tústi, máselen, shańsorǵysh – 1,6%, qysqa tolqyndy pesh – 1,3%, as úı plıtasy 1,1% arzandady.

Ótken aıda aqyly qyzmetterdiń baǵasy 0,7% ósti.

Baǵa ósimi notarıýs qyzmetterine – 12,6%, kúndizgi statsıonarda emdelý – 5,2%, jerleý boıynsha rıtýaldy qyzmetke – 4,7%, stomatologııalyq qyzmetterge 2,5% baıqaldy.

Kommýnaldyq qyzmetter boıynsha qoqys shyǵarý tarıfteri – 2,8%, turǵyn úıdi kútip ustaýǵa jumsalǵan tólem – 1%, ortalyqtan jylytý 0,8% ósti, al tarıftiń tómendeýi – sý burý qyzmetine baıqaldy – 0,2%.

Óńirler arasynda eń joǵary aılyq ınflıatsııa Aqtóbe oblysynda – 1,7% (ortasha respýblıkalyq deńgeıden 0,6 p.t. joǵary), eń tómengi – 0,7% Almaty oblysynda tirkeldi.

Óńirler boıynsha azyq-túlik taýarlaryna eń joǵary ósim Astana jáne Shymkent qalalarynda – árqaısysy 2,2%-dan, azyq-túlikke jatpaıtyn taýarlar boıynsha – Abaı jáne Soltústik Qazaqstan oblystarynda árbireýinde 1,4%-dan, aqyly qyzmetter boıynsha eń joǵary ósim Aqtóbe oblysynda – 2,8%.

2023 jylǵy qańtarda jyldyq mánde ınflıatsııa deńgeıi 20,7% qurady. Azyq-túlik taýarlarynyń baǵasy 25,7%, azyq-túlikke jatpaıtyn taýarlar 20,2%, aqyly qyzmetter 14,2% ósti.

2022 jylǵy qańtarmen salystyrǵanda kir sabyn – 88,5%, keńse taýarlary – 71,4%, pııaz – 62,4%, qant – 60,9%, qııar – 55,6%, konservilengen sút – 46,4%, un – 42,8%, makaron ónimderi 42,3% qymbattady.

Jyldyq mánde, kerisinshe, aq qaýyndy qyryqqabat arzandady – 26,5%.