Bir aıda 21 operatsııa ótkizilip, 1,3 mlrd teńgeniń esirtkisi alyndy - UQK

NUR-SULTAN. QazAqparat - Ulttyq qaýipsizdik komıteti esirtki trafıginiń 6 halyqaralyq jáne 12 óńirlik arnasyn joıdy, dep habarlaıdy QazAqparat.

Esirtki jáne psıhotroptyq zattardyń taralýyna qarsy is-qımyl sheńberinde Ulttyq qaýipsizdik komıteti jedel-izdestirý sharalarynyń keshenin iske asyryp jatyr

Maýsym aıynda UQK esirtkige qarsy 21 operatsııa júrgizdi. Onyń ishinde Reseı, Qyrǵyzstan jáne Ózbekstannyń arnaıy qyzmetteri men quqyq qorǵaý organdarymen birlesken sharalar bar.

Esirtki trafıginiń 6 halyqaralyq jáne 12 óńirlik arnasy joıyldy. Sıntetıkalyq esirtki óndiretin 3 jasyryn zerthananyń qyzmeti toqtatyldy.

Arnaıy operatsııa barysynda esirtki qurylymynyń 31 qatysýshysy ustaldy.

Zańsyz aınalymnan 120,6 kg esirtki, onyń ishinde 61,8 kg sıntetıkalyq esirtki (206 myń «bir rettik dozaǵa» balamaly), 6 kg marıhýana, 52,7 kg gashısh tárkilendi.

Budan basqa, psıhotroptyq zattardy daıyndaýǵa arnalǵan 6000 ekstazı tabletkasy jáne 2 tonnadan astam hımııalyq reagentter aınalymnan shyǵaryldy.

Maýsym aıynda alynǵan esirtkiniń jalpy somasy «qara naryqta» 1.3 mlrd teńgeden astam baǵalanady.

Halyqaralyq esirtki bıznesine qarsy is-sharalar jalǵasyp jatyr.