Bir aýylǵa jalǵyz ózi qaraıtyn medbıke: Aýylymyzǵa jedel járdem kóligi men dáriger kerek

AQTAÝ. QazAqparat - Mańǵystaý oblysy Mańǵystaý aýdanyna qarasty Beki aýylynyń turǵyny Nazıra Erǵalıeva 10 jyldan beri medbıke bolyp jumys isteıdi. Ol dittegen jerine velosıped nemese mototsıklmen barady, dep habarlaıdy QazAqparat qoǵamdyq kommýnıkatsııa ortalyǵyna silteme jasap.

Nazıra Erǵalıeva aýyl halqyna jalǵyz ózi sapaly qyzmet kórsetip keledi.

Turǵyndardyń shaqyrtýyna jaıaý, alystaý jerge velosıped, bolmasa joldasynyń mototsıklimen barady.

«Jedel járdem kóligi joq» dep qoldy bir siltemeı, qalaıda jetýdiń amalyn oılastyratyn Nazıraǵa aýyl turǵyndary dán rıza.

- Bekide turǵyndar sany kún sanap artyp keledi. Biraq, ókinishke qaraı, jedel járdem kóligi joq. «Jańa mekteptiń qurylysy bastaldy» dep qýanǵan bekilikter, endi «aýylǵa jedel járdem kóligi keldi» dep bir qýansa eken deımiz. Aýyldyń basym kópshiligi úlken kisiler, jedel járdemniń kómegine kóp júginedi. Kúndiz-túni telefonyma tynyshtyq joq. Shamam jetkenshe, barlyǵyna úlgerýge tyrysamyn. Qazir maman tapshylyǵy qatty seziledi. Áıtpese, turǵyndar «dári-dármegimizdi ýaqytynda ala almadyq» dep renjise, aýyldaǵy jalǵyz melbıke ekenimdi bilgen soń amal joq, aýrýy janyna batsa da, kezek kútip jatyp qalady. Osyndaıda qasymda taǵy bir maman bolsa, qandaı jaqsy bolar edi dep oılap qoıamyn, - deıdi Nazıra.

Nazıra mezgil de, meken de tańdamaıdy. Alaıda, qazir shalǵaı aýyldarǵa baryp, jumys istegisi keletinder joqtyń qasy.

«Bári aýdan-qalalarda jumys jasaǵysy keledi. Joǵarǵy oqý ornyn bitirgen jastar aýyldaǵy maman tapshylyǵyna bas aýyrta qoımaıtyn sekildi», - deıdi ol.