Bir aptada 6,5 mln adam koronavırýs juqtyrdy – DDU

NUR-SULTAN. QazAqparat – Dúnıejúzilik densaýlyq saqtaý uıymynyń málimetinshe ótken aptada 6,5 mln astam adam koronavırýs juqtyryp, dertten 14 myń adam kóz jumdy. Bul kórsetkish odan burynǵy aptamen salystyrǵanda 9%-ǵa, qaıtys bolǵandar kórsetkishi 3%-ǵa qysqarǵan. Bul týraly QazAqparat TASS-qa silteme jasap habarlaıdy.

«Jeti kún ishinde DDU-ǵa 6 565 679 adamnyń juqtyrǵany jáne 14 179 adamnyń indetten qaıtys bolǵany týraly aqparat túsken. Vırýs juqtyrǵandar sanynyń ósýi Batys Tynyq muhıty aımaǵynda (plıýs 20%) jáne Afrıkada (plıýs 5%) tirkeldi. Sonymen qatar aýrý Eýropada (mınýs 35%) jáne Shyǵys Jerorta teńizinde (mınýs 12%) aıtarlyqtaı tómendedi. Ólim-jitimniń edáýir ósimi Batys Tynyq muhıty aımaǵynda (plıýs 44%), Shyǵys Jerorta teńizinde (plıýs 26%) jáne Ońtústik-Shyǵys Azııada (plıýs 20%) anyqtaldy.

Al Eýropada aýrý kórsetkishi tómendedi (mınýs 26%). Japonııa bir aptadaǵy eń kóp aýrý juqtyrǵandar týraly habarlady - 1 379 099 adam. Odan keıin AQSh (923 366), Koreıa Respýblıkasy (564 437), Germanııa (459 724) jáne Italııa (394 583). AQSh-ta jeti kúnde qaıtys bolǵandar sany eń kóp tirkelgen -2 626, delingen aqparattyq bıýlletende.

3 tamyzdaǵy jaǵdaı boıynsha DDU-ǵa pandemııa bastalǵaly 557 018 226 adamnyń koronavırýs juqtyrǵany jáne 6 401 046 adamnyń qaıtys bolǵany habarlanǵan.