Bir apta ishinde elimizde 18 kisi óltirý qylmysy ashyldy

NUR-SULTAN. QazAqparat – Bir apta ishinde elimizdiń aýmaǵynda 3 004 qylmys jasaldy. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.

«Bir apta ishinde 3 004 qylmys jasaldy, onyń 2 046 táýlik ishinde ashyldy. Polıtsııa qyzmetkerleri «izin sýytpaı» 18 kisi óltirýdi, 6 ólimge ákep soqqan densaýlyqqa qasaqana aýyr zııan keltirýdi, 3 qaraqshylyq, 27 tonaý jáne 449 bóten múlikti urlaý qylmystaryn ashty»,- dedi resmı ókil ІІM baspasóz alańynda ótken brıfıng barysynda.

Sonymen qatar ol Memleket basshysy Qasym-Jomart Toqaev bastamashy bolǵan «Halyq únine qulaq asatyn memleket» tujyrymdamasy is júzinde azamattar men memleket arasyndaǵy dıalog, ózara is-qımyl jáne yntymaqtastyqqa jańa negiz qalatyndyǵyn aıtty.

«Onyń basty ıdeıasy - azamattardyń máselelerin estý jáne kórý ǵana emes, olarǵa durys jáne obektıvti jaýap berý, adamdarmen ashyq dıalog júrgize bilý. Búgingi tańda biz tyńdaýshy memlekettiń tujyrymdamasyn is júzinde kórip otyrmyz. Qazaqstandyq polıtsııa halyq tarapynan túsken saýaldarǵa barynsha jedel jaýap qaıtarýǵa, shynaıy sheshimder men jaýaptar uıymdastyrýǵa tyrysady», - dedi Nurdildi Oraz.