Bir apta azyq-túlik joq: Balqash mańyndaǵy aýyl qar qursaýynda qaldy

BALQASh. QazAqparat – Qaraǵandy oblysynyń Balqash qalasynan 60 shaqyrym jerde ornalasqan Bektaý ata aýylynyń turǵyndary qalyń qar qursaýynan shyǵa almaı otyr. Eldi mekendegi 30 otbasy tipti, bir apta boıy azyq-túlikke qol jetkize almaı, qıyndyq kórgen, dep habarlaıdy QazAqparat tilshisi.

Bektaý ata aýylyna Balqash-Qaraǵandy trassasymen tozyǵy jetken asfalt aparady. Ol keńes zamanynda salynǵan. Onyń uzyndyǵy nebári 12 shaqyrymdy quraıdy. Sońǵy bes jylda bul aýmaq qar qursaýynda qalyp keledi. Aqpan aıynyń ózinde turǵyndar aptaǵa jýyq ýaqyt qalaǵa qatynaýdan qalǵan. Sonymen qatar bul aýmaqta uıaly baılanys ta nashar. Boranda qalyp qoıǵandar qutqarýshylarǵa nemese basqa da shuǵyl qyzmetterge jedel habarlasa almaıdy. Al jergilikti belsendilerdiń aıtýynsha, Aqtoǵaı aýdany ákimdiginiń ókilderi bul máselege kóz juma qarap otyr.

«Bir apta qar basty joldy. Ózim 66-markaly úlken tehnıkamen turǵyndarǵa kerek-jaraqty jetkizip turdym. Jeńil kólik turmaq, djıptardyń ózi qatynaı almaıdy. Qazir joldy ashqan. Biraq jaǵdaı taǵy qaıtalana ma degen úreıdemiz. Osy jaǵdaı qaıtalanbasa eken», - deıdi Bektaý ata turǵyny Ulan Málibek.

Aqtoǵaı aýdanynyń ákimdigi turǵyndar shaǵymyna jaýap berdi.

«Qatty boran saldarynan joldardy jabý oryn alǵan. Barlyq jumystar júrgizilýde», - dedi Aqtoǵaı aýdany ákiminiń orynbasary Saıan Muratuly.

Aıta keteıik, jergilikti turǵyndar birer kún buryn osy máselege qatysty beıbit sherý uıymdastyrýdy josparlaǵan. Jaǵdaıdan habardar bolǵan bılik máseleni birden nazarǵa alyp, qar kúreýge jedel tehnıka da tapqan. «Taǵy kún boratyp, joldy qar bassa, aýdan ákimdigi aýyl halqynyń jaıyn jiti nazarda ustasa», - dep ótinish bildiredi aýyl jurty.