Bir ákim laýazymyna ortasha eseppen 3 úmitkerden kelip otyr - OSK

ASTANA. 15 shilde. QazAqparat - Respýblıkanyń barlyq óńirlerinde Qazaqstannyń aýdandyq mańyzy bar qalalary, aýyldyq okrýgteri, aýyldyq okrýgtiń quramyna kirmeıtin kentter men aýyldary ákimdigine kandıdattardy usyný aıaqtaldy. Bul týraly QR Ortalyq saılaý komıssııasynyń baspasóz hatshysy Venera Jeksembekova málim etti.

«Respýblıka boıynsha 7162 kandıdat usynyldy. Atap aıtqanda bir ákim laýazymyna ortasha eseppen 3 úmitkerden kelip otyr»,-dedi ol.

Usynylǵan kandıdattardyń 17,3 paıyzy aýyl sharýashylyǵy salasynyń mamandary, 15,5 paıyzy - ekonomıster, 12,8 paıyzy - ınjenerler, 9,7 paıyzy - zańgerler.

«Sonymen qatar 25,3 paıyzy qazirgi ákimder, 61,9 paıyzy memlekettik mekemede, uıymdarda jáne kásiporyndarda jumys isteıdi, sondaı-aq 4,2 paıyzy memlekettik emes salanyń qyzmetkeri bolyp tabylady», - dedi V. Jeksembekova.

Ákimdikke kandıdattardan qajetti qujattardy alǵannan keıin saılaý komıssııalary úmitkerlerdiń QR Prezıdentiniń Jarlyǵymen bekitilgen Ákimderdi saılaý qaǵıdalarynyń talaptaryna sáıkestigin tekserýdi uıymdastyrady.

«Osy ýaqytqa deıin 329 kandıdat tirkeldi. Tirkeý rásimi elimizdiń barlyq oblystarynda daýys berý kúnine 15 kún qalǵanda aıaqtalady»,-dedi baspasóz hatshysy.

Usynylǵan kandıdattar quramynda 33 ult ókili bar. Olardyń 75,6 paıyzy erler, al 24,4 paıyzy áıel azamatshalar. Kandıdattardyń ortasha jasy 44,4-ti qurady.