Bir adamnyń densaýlyqqa jumsaıtyn shyǵyndary 56 myńnan 122 myń teńgege deıin ósken

ASTANA. QazAqparat – Eldiń bir turǵynyna densaýlyq shyǵyndary 56 myń teńgeden 122 myń teńgege deıin ulǵaıǵan. Bul týraly Densaýlyq saqtaý vıtse-mınıstri Tımýr Sultanǵazın ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Sońǵy 3 jylda kúndizgi statsıonarlarǵa aqy tóleýdi qarjylandyrý 4 mlrd teńgeden 6 mlrd teńgege deıin ulǵaıdy. Al konsýltatsııalyq-dıagnostıkalyq kómekke bólinetin soma aǵymdaǵy jyly 25 mlrd teńgeden 364 mlrd teńgege deıin, ıaǵnı 14 ese ósti. Mindetti áleýmettik medıtsınalyq saqtandyrý júıesi arqyly bólinetin qarajatty eskere otyryp, eldiń bir turǵynyna densaýlyq shyǵyndary 56 myń teńgeden 122 myń teńgege deıin ulǵaıdy», - dedi vıtse-mınıstr.

Onyń sózine qaraǵanda, 2019 jyly 20 mıllıonǵa jýyq beıindi mamandar konsýltatsııasy men dıagnostıkalyq zertteý júrgizilgen.

«Alaıda, ótken jyly bul tsıfr 142 mıllıonǵa deıin ósti, ıaǵnı 7 ese kóp. Bul rette dárigerlerdiń qabyldaýynyń, zerthanalyq taldaý jáne aspaptyq dıagnostıka júrgizýdiń 7 ese óskenin kórsetedi. Mysaly stomatologııany alaıyq. 2019 jyly 3 mıllıonǵa jýyq stomatologııalyq qyzmet kórsetildi, al ótken jyly bul kórsetkish 13 mln deıin, ıaǵnı shamamen 5 ese ósti. Bul stomatologııalyq kómektiń adamdarǵa qoljetimdi bolǵanyn kórsetedi», - dedi Tımýr Sultanǵazınov.