Bir adam óz atyna qansha sheteldik kólikti zańdastyra alady

ASTANA. QazAqparat – QR ІІM Ákimshilik polıtsııa komıteti tóraǵasynyń mindetin atqarýshy Qaısar Sultanbaev bir azamat óz atyna neshe sheteldik kólik zańdastyra alatynyn túsindirdi, dep habarlaıdy QazAqparat tilshisi.

«Shetelden ákelingen kólikti zańdastyrý úshin onyń ıesi mindetti túrde Qazaqstan Respýblıkasynyń azamaty bolý kerek. Al bir azamattyń atyna neshe kólik zańdastyrý kerek degen kelsek, sany boıynsha eshqandaı shekteý joq», - dedi komıtet basshysy ortalyq kommýnıkatsııalar qyzmetinde ótken brıfıngide.

Bul úshin zańdastyrýǵa jatatyn kólik mynadaı úsh talapqa saı bolýy kerek:

Birinshisi – avtokólik izdeýde bolmaýy kerek.

Ekinshisi – kedendik tazartýdan ótken bolýy kerek.

Úshinshisi – 2022 jylǵy 1 qyrkúıekke deıin ákelingen kólikter bolýy qajet

Sondaı-aq, ol tehnıkalyq aqaýy bar kólikti zańdasytyrý úshin jóndeý mindetti ekenin eskertti.

«Zańdastyrýǵa jatatyn kóliktiń «jasyna», ekologııalyq klasyna, rýliniń qaı jaǵynda ornalasqanyna baılanysty eshqandaı tyıym joq ekenin taǵy qaıtalap aıtamyn. Al tehnıkalyq jaǵdaıyna kelsek, tirkeý kezinde tehnıkalyq baqylaýdan ótkizemiz. Eger kóliktiń tehnıkalyq turǵydan aqaýy bar bop shyqsa,ony tirkeýge qoıa almaıtyn shyǵarmyz. Jol qozǵalysyna tek tehnıkalyq aqaýy joq kólikter ǵana qatysýy kerek. Tehnıkalyq baıqaý degen sol úshin kerek. Biraq bul biz ondaı kólikti tirkeýden bas tartamyz degen sóz emes. Iesi ony jóndep, aqaýdy joıyp, qaıtadan tirkeý pýnktine júgine alady. Aqaý shynymen joıylǵan bolsa, kólik tirkeýge qoıylady», - dedi Qaısar Sultanbaev.