Bir adam qansha gektar jer ıemdene alady - QR AShM

ASTANA. QazAqparat – Qazaqstan azamatynyń ıeliginde bolýy múmkin aýylsharýashylyq jerdiń shekti merzimi bekitildi, dep habarlaıdy QazAqparat tilshisi.

Bul týraly QR Aýyl sharýashylyǵy mınıstriniń orynbasary Ábilhaıyr Tamabek vedomstvonyń keńeıtilgen alqa májilisinde aıtty.

«Bıylǵy 11 qańtarda Úkimet jer paıdalaný quqyǵy bir qolda bolýy múmkin aýyl sharýashylyǵy maqsatyndaǵy jer ýchaskeleriniń shekti (eń joǵary) mólsherin bekitý týraly qaýly jobasyn maquldady.

Respýblıka boıynsha orta eseppen, tabıǵı-klımattyq jaǵdaılarǵa baılanysty sharýa jáne fermer qojalyqtary úshin aýyl sharýashylyǵy alqaptarynyń shekti (eń joǵary) mólsheri 35 myń gektar, zańdy tulǵalar úshin – 51 myń gektar mólsherinde belgilengen. Bul rette osy norma engizilgenge deıin berilgen jerler boıynsha tıisti taldaý júrgiziledi», - dedi vıtse-mınıstr.

Sondaı-aq, ol jerdi paıdalaný men qorǵaýǵa memlekettik baqylaýdy jetildirý boıynsha jumystar jalǵasatynyn atady.

«Ol úshin Ákimshilik quqyq buzýshylyq týraly kodekske jerdi paıdalaný men qorǵaýdy memlekettik baqylaýdy júzege asyratyn organdardy aıqyndaýdy, jerdi paıdalaný men qorǵaý jónindegi bas memlekettik ınspektorlar salatyn aıyppuldardyń shekti mólsherin ulǵaıtýdy, sondaı-aq ákimdikterdiń laýazymdy adamdarynyń saýda-sattyq pen konkýrstardy jáne ótkizbeý nemese ýaqtyly ótkizbeý jaýapkershiligin anyqtaýdy jáne t.b. kózdeıtin máseleler boıynsha ózgerister engizý jónindegi zań jobasy ázirlendi.

«Bıylǵy 18 qańtarynda Zań jobasy Parlament Májilisiniń ekinshi oqylymynda maquldanyp, Senatqa joldandy», - dedi Ábilhaıyr Tamabek.