Bıopreparattar sapasy jóninde táýelsiz mekeme qajet - senator

NUR-SULTAN. QazAqparat – Kooperatıvterge jaǵdaı jasaý aýadaı qajet. Bul týraly QR Parlamenti Senatynyń depýtaty Dúısenǵazy Mýsın málim etti, dep habarlaıdy QazAqparat tilshisi.

«Búginde jeke qosalqy sharýashylyqtardyń mártebesine arnalǵan normatıvtik-quqyqtyq baza qurý, kooperatıvterge jaǵdaı jasaý aýadaı qajet. Bul eń aldymen, ónimderdi deldalsyz ótkizýge jol ashady. Qazirgi ýaqytta óndirilgen ónimdi daıyndaý, bastapqy óńdeý, óńdeýshi kásiporyndarǵa jetkizýdiń júıesi joq. Sonymen qatar, servıstik qyzmetter, ıaǵnı agrohımııa, veterınarııa, fıtosanıtarııa, melıoratsııa jáne basqalarynyń deńgeıleriniń tym tómendigi – salanyń ósýin tejeýshi faktorlardyń biri. Bul problemalardyń oń sheshim tabýy – tabys deńgeıine, azyq-túlik baǵasyn turaqtandyrýǵa yqpal eteri sózsiz», - dedi depýtat Senatta agroónerkásiptik keshendi damytý taqyrybyna arnalǵan parlamenttik tyńdaýda.

Onyń atap ótýinshe, mal sharýashylyǵyndaǵy maqsatty ındıkatorlarǵa qol jetkizý veterınarlyq ahýalǵa tikeleı baılanysty. Saladaǵy biraz máseleler agroónerkásip keshenin retteý jónindegi zańda qaraldy. Degenmen, sharýashylyqtarda mamandar jetispeýde, «Dıplommen aýylǵa» baǵdarlamasymen keıingi 3 jylda tek 254 mal dárigeri jumysqa ornalasty. Jyl saıyn 3,5 myń maman daıyndalsa, onyń 20 paıyzy ǵana er balalar.

«Asa qaýipti aýrýlarǵa qarsy preparattar tek sońǵy 3 jylda 12 mlrd teńgege shetelden satyp alynǵan. Bul máseleni sheshý úshin memlekettik bıokombınattyń bolýynyń strategııalyq mańyzy zor.

Bıopreparattar sapasy jóninde táýelsiz mekeme qajettigi depýtattyq saýalda da kóterilgen bolatyn. Epızootııalyq ahýal, memlekettik satyp alý, azyq-túlik jáne bıologııalyq qaýipsizdikti retteý boıynsha usynystar Aýyl sharýashylyǵy mınıstrligi tarapynan nazarǵa alynyp, qarastyrylýy tıis», - dedi D. Mýsın.

Budan buryn habarlanǵandaı, Dúısenǵazy Mýsın aýyl sharýashylyǵynda sýbsıdııalaý erejeleriniń jıi ózgerýi salanyń damýyna keri áserin tıgizip jatqanyn aıtty.