Byltyr Pavlodar oblysynda orman órtterinen kelgen shyǵyn 240 mln teńgeni qurady

<p>PAVLODAR. KAZINFORM - Óńirde jalpy sany 207 orman órti tirkelip, tilsiz jaý jalpy aýmaǵy 3905 gektardy jaıpap ótken. Jalyn kóp jaǵdaıda naızaǵaı saldarynan tutanǵanyn aıtady mamandar.</p>

Oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Rýslan Tólepbaevtyń sózinshe, ótken jyly órt oqıǵalarynyń sany 22-ge, al kúıik shalǵan alqaptar 3 myń gektarǵa ulǵaıǵan. 18 jaǵdaıda órttiń aýmaǵy 25 gektardan asyp túsken, bul — iri órt oqıǵasy bolyp sanalady.

— Orman sharýashylyǵy jáne janýarlar dúnıesi komıtetiniń buıryǵyna sáıkes, bıyl órt qaýpi bar maýsym 8 sáýirden bastalyp ketti. Bizdiń mamandarymyz buǵan deıin orman qorǵaý mekemeleriniń maýsymǵa daıyndyǵyn tekserip shyqqan. Onyń qorytyndysy boıynsha tek «Ertis ormany» rezervatynyń daıyndyǵy qanaǵattanarlyq degen sheshimge keldik. Baıanaýyl ulttyq parkinde, Maksım-Gorkıı jáne Úrlitúp orman mekemelerindegi daıyndyq ortasha dep baǵalandy. Al Pavlodar orman mekemesiniń ázirligi qanaǵattanarlyqsyz, — deıdi ol.

«Ertis ormany» rezervaty men Baıanaýyl ulttyq parkiniń órtke qarsy tehnıkamen jáne jabdyqtarmen jaraqtalýy 100%-dy qurasa, ózge úsh mekemedegi bul kórsetkish 84%-dy kórsetken. Oblystyq bıýdjetten sońǵy atalǵan úsh mekemege kólik quraldaryn satyp alýǵa 441 mln teńge bólindi. Oblysta barlyǵy 56 órt sóndirý avtomashınasy, aspaly jabdyǵy bar 68 birlik órt traktory, ÝAZ bazasynda 42 shaǵyn orman órteý keshenderi bar. 

Órtke jaýapty mekemeler bıyl kóktemniń ekinshi jartysynda aýa temperatýrasy jyldaǵydan joǵary bolatynyn, soǵan oraı órtke qarsy is-sharalardy nyqtaı túsý kerek ekenin eskertip otyr

Eske sala keteıik, bıyl «Ertis ormany» rezervatynda orman órtterin erte anyqtaý júıesi iske qosyldy.