Byltyr Qazaqstanda jasalǵan avtomobıl sany 100 myńnan asqan

<p>Memleket basshysy Mercedes-Benz Group kompanııasynyń basqarma tóraǵasy Ola Kallenıýspen kezdesti, dep habarlaıdy <a href="https://kaz.inform.kz/" target="_blank" rel="noopener">QazAqparat </a>Aqordanyń <a href="https://t.me/aqorda_resmi" target="_blank" rel="noopener">baspasóz</a> qyzmetine silteme jasap.</p>

Kezdesýde avtokólik ındýstrııasy jáne ınnovatsııalyq sheshimder salalaryndaǵy yntymaqtastyq perspektıvalary talqylandy.

Prezıdent Qazaqstannyń ekonomıkany ártaraptandyrýǵa jáne ónerkásip óndirisin damytýǵa umtylatynyn atap ótti. Bul strategııada mashına jasaý salasy erekshe oryn alady.

Qasym-Jomart Toqaev qazirgi tańda elimizde General Electric, General Motors, Chevrolet, Kia jáne Hyundai sekildi tanymal álemdik kompanııalar tabysty jumys istep jatqanyn aıtty. Byltyr Qazaqstanda óndirilgen avtomobıl sany 100 myńnan asyp, 28 paıyzǵa ulǵaıǵan. Eksport eki ese ósip, 3,8 mıllıard dollarǵa jetken.

Nemis avtokontserniniń basshysy Prezıdentke kompanııanyń jahandyq jetkizý tizbegin damytý isindegi tyń tásilder jáne Qazaqstan ekonomıkasy úshin ashylatyn jańa múmkindikter týraly málimet berdi.

Mercedes-Benz Group – álemdegi avtokólik óndiretin jetekshi kompanııalardyń biri. 2022 jyly kompanııa 2,5 mıllıonǵa jýyq avtomobıl qurastyryp shyǵarǵan.

Byltyr Mercedes-Benz Group álemdegi eń iri kompanııalardyń Forbes Global 2000 tiziminde 41-orynǵa, al Fortune Global 500 tiziminde 38-orynǵa ıe bolǵan.

Osyǵan deıin Qazaqstan men Germanııa Prezıdentteri kópjaqty yntymaqtastyqty nyǵaıta túsýge ýaǵdalasqany týraly jazdyq.

Qasym-Jomart Toqaev Ortalyq Azııa memleketteri basshylarynyń Germanııa Prezıdentimen kezdesýine qatysty.