Byltyr Qazaqstan 79 mlrd dollardyń ónimin eksporttaǵan

<p>ASTANA. KAZINFORM &ndash; Byltyr Qazaqstannyń syrtqy saýdadaǵy taýar aınalymy 140 mlrd dollarǵa jetken. Bul týraly Premer-Mınıstrdiń orynbasary &ndash; Ulttyq ekonomıka mınıstri Nurlan Baıbazarov Úkimet otyrysynda aıtty.</p>

«Qańtar aıynyń qorytyndysy boıynsha Qazaqstan ekonomıkasynyń ósý qarqyny 3,9% boldy. Onyń ishinde naqty sektor 3,8%, qyzmet kórsetý salasy 3,5% ósti. Salalar arasynda eń joǵary ósýdi qurylys, kólik jáne qoımalaý, aqparat jáne baılanys, sondaı-aq óńdeý ónerkásibi kórsetti», - dedi mınıstr. 

Onyń sózinshe, ınvestıtsııalar aǵyny ásirese bilim berý (3,6 ese), qarjy jáne saqtandyrý qyzmeti (3 ese) kólik jáne qoımalaý (2,1 ese), qurylys (2 ese), aqparat jáne baılanys (20,9%), óńdeý ónerkásibi (15,8%) salalarynda artqan. 

Óńirler arasynda eń joǵary ósý Jetisý, Ulytaý, Jambyl jáne Almaty oblystarynda baıqaldy.

Aldyn ala qorytyndy boıynsha 2023 jyly syrtqy saýda taýar aınalymy 3,2% ósip, 140 mlrd dollarǵa jýyqtady. Eksport 79 mlrd dollarǵa jýyqtap, onyń ishinde óńdelgen taýarlar eksporty 25 mlrd dollardan asty.

«Taýarlar ımporty 61 mlrd dollardan asty. Jalpy, oń saýda balansy 18 mlrd dollarǵa jýyq. Óńdeý ónerkásibinde oń ósý saqtalyp otyr. Óndiris kólemi 6,9% ósti. Kórsetkishtiń ósýi 14 óńirde tirkeldi. Sonyń ishinde eń joǵary ósýdi Aqtóbe, Shyǵys Qazaqstan, Qyzylorda jáne Abaı oblystarynda baıqaldy», - dedi Nurlan Baıbazarov.