Byltyr elde tabıǵı jáne tehnogendik apattardan 744 adam kóz jumǵan

<p>ASTANA. KAZINFORM &mdash; Byltyr elimizde 744 adamnyń ajaly tabıǵı jáne tehnogendik apattardan kelgen. Bul týraly Ekologııa jáne tabıǵı resýrstar mınıstrliginiń 2023 jylǵy qorshaǵan orta ahýaly týraly ulttyq baıandamasynda aıtylǵan.</p>

— Tótenshe jaǵdaılar mınıstrliginiń málimetteri boıynsha 2023 jyly tabıǵı jáne tehnogendik sıpattaǵy 12 891 tótenshe jaǵdaı men oqıǵa tirkelip, saldarynan 1 942 adam zardap shekti. Onyń 744-i qaıtys boldy, — dep jazady mınıstrlik sarapshylary.

Mınıstrlik málimeti boıynsha taýly aımaqtardy údemeli ıgerýdiń saldarynan keıingi 5 jylda kóshkin qaýpi bar aýmaqtardyń sany 599-dan 619-ǵa deıin ósken.

— Tótenshe jaǵdaılar mınıstrliginiń derekteri boıynsha 2023 jyly 2022 jylmen salystyrǵanda sý tasqynynan zardap shekken eldi mekenderdiń sany 2 eseden astam, turǵyn úıler sany 1,8 ese ósti, — dep jazylǵan qujatta.

Byltyr elde tirkelgen órt sany 2022 jyldyń kórsetkishinen az bolǵanymen, sharpyǵan aýmaǵy áldeqaıda kóp bolǵan.

— 2023 jyly tek respýblıkanyń orman qorynda 810 orman órti boldy (Pavlodar oblysy — 207, Abaı aýdany — 191, Aqmola oblysy — 107, Shyǵys Qazaqstan oblysy — 77, Qostanaı oblysy — 50, Qaraǵandy oblysy — 45, Almaty oblysy — 30, Soltústik Qazaqstan oblysy — 27, Qyzylorda — 24, Aqtóbe — 18, Batys Qazaqstan, Jambyl, Jetisý — 7, Atyraý — 6, Túrkistan — 5, Shymkent (1), Ulytaý (1). Ótken jyldyń sáıkes kezeńimen salystyrǵanda orman órtiniń sany 1%-ǵa, órt aýmaǵy 13%-ǵa, materıaldyq shyǵyn 7,9 esege artty. Sondaı-aq, 2023 jyly ótken jylmen salystyrǵanda dala órtteri sanynyń 48%-ǵa azaıýy, al olardyń aýmaqtarynyń 27%-ǵa ulǵaıýy baıqalady, — dep jazady mınıstrlik mamandary.

Buǵan deıin habarlanǵandaı, Almaty metrosynda mert bolǵan zaǵıp jolaýshynyń qulaǵan sáti vıdeoǵa túsip qalǵan.