Byltyr batystaǵy 3 oblysta brakonerlerge 29,2 mln teńge aıyppul salynǵan
Jaıyq-Kaspıı oblysaralyq basseındik balyq sharýashylyǵy ınspektsııasynyń ókili Oleg Týshkanovtyń málimetine súıensek, ótken jyly brakonerlik jáne balyq qoryn qorǵaý zańnamasyn buzýmen baılanysty 2 200-den astam quqyq buzýshylyq anyqtalǵan.
– Inspektsııa qyzmetkerleri óreskel zań buzýshylyq belgileri bar 141 hattamany sotqa joldady. Al qylmystyq belgilermen 13 tulǵaǵa qatysty 10 is sotqa deıingi tergep-tekserý úshin quqyq qorǵaý organdaryna jiberildi. Zań talabyn buzýshylarǵa 29,2 mln teńge aıyppul salyndy. Onyń ishinde 25,4 mln teńge el bıýdjetine qaıtaryldy. Balyq qoryna 6,8 mln teńge zalal keltirgen 29 adam jazaǵa tartyldy, -dep habarlady Oleg Týshkanov.
Onyń deregine súıensek, zańsyz aınalymnan 4 tonna 638 keli balyq tárkilengen. Onyń ishinde 383 keli bekire tuqymdas balyq túrleri bar. Zańsyz balyq aýlaýshylardan 2 800-den astam aýlaý quraly, 100-ge jýyq kólik alynǵan.
– Byltyrǵy kóktemgi tasqyn kezinde jaıylmaǵa shyqqan sýdan balyq shabaqtaryn qutqarý qolǵa alyndy. Máselen, ınspektsııa mamandarynyń kómegimen Atyraý oblysynda 104,5 mln, al Batys Qazaqstan oblysynda 26,3 mln shabaq qutqarylyp, tabıǵı ortasyna jiberildi, -dep málim etti Oleg Týshkanov.
Eske sala ketelik, buǵan deıin Atyraý ekologteri byltyr tabıǵatty búldirgenderge 44,8 mlrd aıyppul salǵanyn habarlaǵan bolatynbyz.