«Bilim týraly zańyna ózgerister men tolyqtyrýlar engizý týraly» zań jobasynda kásiptik-tehnıkalyq bilim berýge erekshe kóńil bólinetin bolady - senator

qpannyń 24-i. QazAqparat /Aıdar Ospanalıev/ - Jaqynda Senat depýtattary Qazaqstan Respýblıkasynyń «Bilim týraly zańyna ózgerister men tolyqtyrýlar engizý týraly» zań jobasyn qaraıdy. Ondaǵy ózgerister negizinen kásiptik-tehnıkalyq bilim berý salasynyń tıimdiligin arttyrýdy kózdeıdi. Bul týraly búgin osy máselege baılanysty Astanadaǵy Polıtehnıkalyq kolledjde ótken kóshpeli jıyn barysynda senator Aqan Bıjanov málim etti,

dep habarlaıdy QazAqparat.

Onyń aıtýynsha, búginde eldiń ındýstrııalyq-ınnovatsııalyq damý baǵdarlamasy men «bıznestiń jol kartasy» sharalaryn júzege asyrý jáne zaman talaby elimizdiń ekonomıkasy úshin orta deńgeıli joǵary bilikti kadrlardy daıyndaýdy qajet etip otyr. Osyǵan qaraı kásiptik-tehnıkalyq bilim berý qazir óte mańyzdy máselege aınalýda. «Endi bizge osy kadrlardy daıyndaý jumystarynyń tıimdiligin arttyratyn tetik daıyndaý qajet. Osy turǵydan alǵanda búgingi otyrystyń mán-mańyzy erekshe deýge bolady», dedi A.Bıjanov.

Kóshpeli otyrysqa Senat depýtattary men Bilim jáne ǵylym mınıstri Janseıit Túımebaev, Astana qalalyq ákimshiligi men birqatar memlekettik organdar ókilderi jáne joǵary oqý oryndarynyń ustaz-mamandary, ǵalymdar qatysty. Olar eldegi kásiptik-tehnıkalyq bilim berý máselesine qatysty ózara pikir almasyp, quzyrly mınıstrlikter men vedomstvolardyń qundy, tyń málimetterimen tanysty.