Bilim salasyna tyń ózgerister qajet - Rıta Sultanǵalıeva
Onyń aıýynsha, Elbasy Nursultan Nazarbaev «Nur Otan» partııasynyń HVІІІ sezinde áleýmettik sala máselelerine erekshe toqtaldy.
Sonyń ishinde kópbalaly otbasylarǵa qamqorlyqty kúsheıtý, áleýmettik jaǵynan az qamtylǵan turǵyndardy qoldaý, tabysy az qyzmetkerlerdiń jalaqysyn kóterý, turǵyn úı máselelerin sheshýmen qatar bilim berý men densaýlyq saqtaý salasyn túbegeıli jaqsartý, aımaqtardy keshendi damytý baǵytynda naqty tapsyrmalar berdi.
«JOO qyzmetkeri retinde, árıne, bilim salasyndaǵy máseleler bizdi jıi tolǵandyrady. Elbasy osy saladaǵy reformalardyń nátıjeli aıaqtalýyn talap etip, onyń júzege asyrý joldaryn kórsetip berdi», deıdi Rıta Sultanǵalıeva.
Onyń paıymdaýynsha, qazirgideı kezeńde jetkinshek urpaqqa bilim berýde úlken talaptar júktelip otyr. Tabysqa jetý úshin pedagogtardyń biliktiligin únemi arttyrýmen birge bilim oryndarynyń materıaldyq bazasyn jaqsartý, mazmundy oqytý baǵdarlamalaryn engizý qajet. Bul oraıda asyǵystyq jasamaı, «jeti ret ólshep, bir ret kesý» mańyzdy.
«Memleket basshysy aıtqanyndaı, ár aımaqta keminde bir jan-jaqty damyǵan, ózgeler úlgi alatyndaı, jetekshi joǵary oqý orny men 10 kolledj jumys jasasa, budan bári de utar edi. Ekinshiden, shynynda da, kez kelgen oqý ornyn túlekterdiń jumysqa ornalasýyna qaraı baǵalap otyrsa, sonda bári aıqyn kórinip turar edi. Úshinshiden, mektepter de aldyńǵy qatarly bilim ordalaryna baǵyt ustap, barynsha tezirek beıimdelse, sapa jetile túser edi. Eń bastysy, alda turǵan mindetter aıtyldy, endi sony kóp bolyp júzege asyrý qalyp tur», dep túıindedi oıyn oqytýshy-ustaz.