Bilim mınıstrliginde mektep oqýlyqtarynyń sapasy talqylandy

NUR-SULTAN. QazAqparat - QR Bilim jáne ǵylym vıtse-mınıstri Sholpan Karınovanyń qatysýymen mektep oqýlyqtarynyń sapasy tóńiregindegi máselelerge arnalǵan alqaly otyrys ótti, dep habarlaıdy QazAqparat tilshisi vedmostvonyń Facebook-tegi resmı paraqshasyna silteme jasap.

«Qazaqstan Respýblıkasynyń Prezıdenti Qasym-Jomart Toqaev halyqqa arnaǵan Joldaýynda oqýlyq sapasyna basa nazar aýdaryp, oqýshylardy sapaly oqýlyqtarmen qamtamasyz etý – tıisti mınıstrliktiń tikeleı mindeti ekendigin aıtqan bolatyn. Osy rette Bilim jáne ǵylym mınıstrligi tarapynan bul baǵytta naqty sharalar qabyldanýda», - dedi vıtse-mınıstr.

Jıynǵa qatysýshylar jańartylǵan mazmundaǵy oqýlyqtardy ázirleý, saraptamadan ótkizý jáne oqý úrdisinde paıdalaný boıynsha atqarylyp jatqan sharalar týraly aqparat berdi. Dóńgelek ústel barysynda orta bilim berýdiń jańartylǵan mazmundaǵy úlgilik oqý baǵdarlamalaryna saı ázirlenip, 2016-2017 oqý jylynan bastap mektepterge engizilip jatqan oqýlyqtar men oqý-ádistemelik keshenderdiń tujyrymdamalyq erekshelikteri boıynsha kásibı túsiniktemeler berildi.

Alqaly otyrysta atalǵan oqýlyqtardyń mazmunyn qurastyrý boıynsha avtorlardyń, ǵylymı-pedagogıkalyq turǵyda baǵalaý boıynsha sarapshylardyń qyzmeti jan-jaqty talqylandy.

Oqýlyqtardy ázirleý, saraptaý jáne tańdap alý júıesi, oqýlyqtar sapasyn jetildirý baǵytyndaǵy Qazaqstan Respýblıkasynyń Bilim jáne ǵylym mınıstrliginiń osy kezge deıin atqarǵan jumystary áńgime arqaýyna aınalyp, aldaǵy ýaqyttarǵa josparlanyp otyrǵan naqty sharalar sóz boldy. Ashyq dıalog formatynda ótken shara barysynda jıynǵa qatysýshylar óz usynystaryn da bildirdi.

Atalǵan sharaǵa Y.Altynsarın atyndaǵy Ulttyq bilim akademııasy jáne «Oqýlyq» respýblıkalyq ǵylymı praktıkalyq ortalyǵynyń qyzmetkerleri, oqýlyq avtorlary men sarapshylary qatysty.

Aıta keteıik, Bilim jáne ǵylym mınıstri Ashat Aımaǵambetov oqýlyqtardyń sapasyn jaqsartýdyń tómendegideı 10 qadamyn usynǵan bolatyn:

1. Muǵalimderdi iriktep, arnaıy kýrstar ótkizý jáne olardy oqyǵandyǵy jaıly kýálandyrý. Qatysýshylardyń turaqty bazasyn qalyptastyrý. Sarapshylar men pándik komıssııalardyń quramyna enetin sarapshylardy málimetter bazasynan jasyryn ádispen tańdap alý.

2. Oqýlyqtar avtorlaryn kýrstan ótkizý.

3. Saraptama júrgizý protsesin jaqsartý. Sarapshylar turaqty túrde oqýlyqpen jumys isteı alatyn arnaıy platforma ashý.

4. Elektrondy platforma arqyly baspalarǵa aıtylǵan eskertýlerdiń nátıjesin baqylaý. Ár eskertýge naqty jaýap bolýy tıis.

5. Oqýlyqtardyń retsenzııasymen jasyryn jumys isteıdi. Oqýlyqtardy saraptaý kezinde sarapshylar oqýlyqtyń avtory kim ekenin bilmeıdi jáne osylaısha qurastyrýshy tarapynan kórsetiletin qysymnan bosatylady.

6. Oqýlyqtarda qate jiberilgen jaǵdaıda, baspa óz qarajatyna oqýlyqtardy almastyrady.

7. Baspa qatelerdi jóndemegen jaǵdaıda belgili bir sanktsııalar qoldanylady.

8. Mınıstrlik oqýlyqtardyń óz baǵasyna jasalatyn taldaýdy baqylaýda ustaıdy.

9. Oqýlyqtardyń kólemin kishireıtý.

10. Belgili bir oqýlyqtardaǵy qate baǵdarlamalardy jóndeý.