Bilim mınıstrligi «Jas Alashtyń» hatyna jaýap berdi

ASTANA. QazAqparat - «Jas Alash» gazetiniń bas redaktory Rysbek Sársenbaı men «Trıbýna» gazetiniń bas redaktory Janbolat Mamaı Bilim jáne ǵylym mınıstri Erlan Saǵadıevti Almatyda ótkiziletin basqosýǵa shaqyrý hatyn jibergen bolatyn.

22 qazan kúnine josparlanǵan bul jıynda respýblıkamyzdyń mektepterinde oqytýdyń úsh tilde júrgizilý máselesi talqylanbaq.

Bilim mınıstrligi hatqa jaýapty Feısbýktegi paraqshasy arqyly jaýap berdi.

«Qurmetti Rysbek Sársenbaıuly, Janbolat Mamaı!

Eń aldymen, Almatyda uıymdastyryp jatqan jıyndaryńyzǵa QR Bilim jáne ǵylym mınıstri Erlan Saǵadıevti shaqyrǵan hatyńyzdyń nazarsyz qalmaǵanyn jetkizgimiz keledi. 
Búginderi bizdiń táýelsiz elimizde qazaq tilin - memlekettik tildi damytý máselesi kim-kimdi de beıjaı qaldyrmasy anyq. Sizderdiń taraptaryńyzdan osy baǵytta únemi kóterilip júrgen máseleler jaıynda habardarmyz. Bilim salasynyń jaǵdaıyna baılanysty óz kózqarastaryńyzdy bildirip, ashyq jáne jarııaly túrde alańdaýshylyq bildirgenińiz - quptarlyq jaıt dep bilemiz. Degenmen, memleket atynan bilim jáne ǵylym salasyn damytý mindeti júktelgen mınıstrlik retinde sizderdiń keltirip júrgen keıbir dáıeksiz pikirlerińizben kelise almaımyz. 
Sondyqtan da, QR Bilim jáne ǵylym mınıstrliginiń sizdermen pikir almasyp, búgingi kúni bilim salasynda ótkizilip jatqan reforma men onyń aıasynda engizilip jatqan kóptegen jańashyl úderister jóninde tolyqqandy aqparat berip, mindet-maqsattaryn túsindirýge múddeli. 
Osy tusta taǵy bir aıta keterlik jaıt bar. 22 qazan kúni QR Bilim jáne ǵylym mınıstri Erlan Saǵadıevtiń qyzmettik kúntizbesinde birqatar memlekettik mańyzy bar is-sharaǵa qatysý mindeti josparlanyp qoıylǵan. Olardyń bári de Astana qalasynda ótetindikten, belgilengen kúni mınıstrdiń Almatydaǵy kezdesýge qatysý múmkindigi bolmaıtynyna túsinistikpen qaraısyzdar, dep úmittenemiz. 
Esesine, áriptesterińizben birge talqylap, bir sheshimge keler degen oımen, mınıstrlik tarapynan sizderge eki usynys jasalady:
1. Sizder qarsy bolmasańyzdar, Almatyda ótetin sharaǵa memlekettiń bilim salasyn damytý saıasatyn qoldap, reformalardy iske asyrýǵa belsene atsalysyp júrgen bir top mamandar, laýazym ıeleri jáne azamattyq qoǵam ókilderi qatysýǵa daıyn.
2. 26 qazan kúni Astanada bilim uıymdarynda qazaq tilin oqytý, onyń qoldaný aıasyn barynsha keńeıtý arqyly memlekettik tildi damytý máseleleri talqylanatyn dóńgelek ústel otyrysy ótkizilmek. Sizderdi osy is-sharaǵa qatysýǵa shaqyramyz.
QR Bilim jáne ǵylym mınıstri E. Saǵadıev sizdermen atalǵan basqosý aıasynda kezdesýge daıyn ekendigin jetkizemiz.

Qurmetpen, Á. Álibekova, QR Bilim jáne ǵylym mınıstrliginiń baspasóz hatshysy», - dep jazylǵan paraqshada.