Bilim mınıstrligi 8 JOO-nyń qyzmetin tekseredi – Ashat Aımaǵambetov

NUR-SULTAN. QazAqparat – Bilim mınıstrligi 8 joǵary oqý ornynyń qyzmetin tekseredi. Bul jaıynda Májilis depýtattarynyń saýalyna Bilim jáne ǵylym mınıstri Ashat Aımaǵambetovtiń jaýabynda aıtylǵan, dep habarlaıdy QazAqparat tilshisi.

«2020 jylǵy jeltoqsannan bastap, joǵary oqý oryndarynyń kommertsııalyq emes aktsıonerlik qoǵamdarǵa qaıta uıymdastyrylýynyń aıasynda mınıstrlik vedomstvolyq baǵynysty joǵary oqý oryndarymen birlesip, olardyń esebin retke keltirý, Jer kodeksiniń talaptaryna sáıkes keltirý, joǵary oqý oryndarynyń jyljymaıtyn múlik obektileri týraly málimetterdi memlekettik organdardyń derekterimen birizdendirý maqsatynda jer ýchaskelerin qosa alǵanda, barlyq jyljymaıtyn múlik obektilerin túgendeý boıynsha jumys júrgizýde. Sonymen qatar, osy jyly mınıstrlik segiz joǵary oqý ornynyń qyzmetin tekserýdi josparlap otyr, onyń barysynda olardyń aktıvteriniń jaıkúıi tekseriletin bolady», - dedi mınıstr.

Onyń atap ótýinshe, mınıstrlik memlekettik múlik jónindegi ýákiletti organda kelisýdegi jyljymaıtyn múlikti, onyń ishinde jer ýchaskelerin ıelikten shyǵarý máselelerin Dırektorlar keńesiniń quzyretine jatqyzý bóliginde JOO Jarǵylaryna ózgerister engizý máselesin pysyqtaǵan. Bul baqylaýdy kúsheıtýge jáne joǵary oqý oryndarynyń aktıvterin qandaı da bir ıelikten shyǵarýdyń aldyn alýǵa múmkindik beredi.

«Joǵary oqý oryndarynyń Dırektorlar keńesteri korporatıvtik sheshimder qabyldaý kezinde ashyqtyqty qamtamasyz etý úshin qurylǵanyn atap ótken jón. Dırektorlar keńesiniń quramyna Qazaqstan Respýblıkasy Parlamentiniń depýtattary, bilim berý salasynyń kórnekti qaıratkerleri jáne táýelsiz sarapshylar engizilgen. Osy maqsatta konkýrstyq rásimder ótkizý arqyly joǵary oqý oryndarynyń rektorlaryn taǵaıyndaýdyń ashyq júıesi engizildi. Jalpy, joǵary oqý oryndary qyzmetiniń tıimdiligi men ashyqtyǵyn arttyrý máseleleri mınıstrliktiń turaqty baqylaýynda», - dedi Ashat Aımaǵambetov.