Bilim mınıstri stýdenttermen toqsan saıyn kezdesip, ózekti máselelerin óz baqylaýyna almaq

NUR-SULTAN. QazAqparat – Bilim jáne ǵylym mınıstrliginiń janynan qurylǵan Stýdenttik keńestiń alǵashqy otyrysy ótti. Bul týraly mınıstr Ashat Aımaǵambetov Facebook paraqshasynda jazdy, dep habarlaıdy QazAqparat tilshisi.

«Bir aı buryn stýdenttermen kezdesý kezinde mınıstrlik janynan Stýdenttik keńes qurylatynyn aıtqan bolatynmyn. Onyń quramynda árbir iri JOO-nyń stýdentteri arasynan bir kóshbasshy jáne respýblıkalyq jastar uıymynan bir kóshbasshy bolady. JOO atynan qabyldanǵan kóshbasshylar stýdenttik ózin-ózi basqarý organdarynyń tóraǵalary bolýy kerek», - dep jazdy mınıstr.

Onyń aıtýynsha, stýdentter máseleleri jónindegi keńestiń otyrystarynda jastardyń bastamalaryn damytýǵa jáne stýdentterdi qoldaýǵa qatysty suraqtar, BǴM quzyretine kiretin barlyq máseleler birge talqylanady. Kóshbasshylar mańyzdy máselelerdi kóterip, mınıstrlikke óz ıdeıalaryn tikeleı baǵyttaýǵa múmkindik alady. Respýblıkalyq keńestiń ár jınalysyna mınıstrdiń ózi qatysyp, suraqtardy talqylap, stýdenttermen birge sheshim qabyldamaq.

«Belgilengen alǵashqy otyrysta biz jastarmen tanysyp, bolashaqqa josparlardy talqylap, júıeli túrde ózara jumys júrgizýge kelistik. Óz kezegimde jastar uıymdary men JOO kóshbasshylaryna atqarylyp jatqan jumystar týraly aıttym. Olar: shákirtaqyny arttyrý, oqytý sapasyna qatysty máseleler, JOO-lardy ońtaılandyrý, stýdenttik jataqhanalar salý jáne taǵy basqa máseleler. Stýdentter máseleleri jónindegi keńestiń kelesi otyrysyn Jańa jyldyń qańtar aıynda ótkizýdi josparlap otyrmyz. Biz jastarmen eń ózekti máselelerdi talqylap, olardy sheshýdiń naqty strategııasyn jasaımyz. Mundaı kezdesýler ár toqsan saıyn ótkiziletin bolady», - deıdi mınıstr.