Bilim mınıstri ınternet arqyly qashyqtan oqytýǵa ne kedergi ekenin aıtty

NUR-SULTAN. QazAqparat – Elimizde 2 mıllıon oqýshy qalada oqıdy. Bul týraly Ortalyq kommýnıkatsııalar qyzmetiniń alańynda ótken mektep oqýshylarynyń ІV toqsanda qashyqtan oqý júıesine arnalǵan onlaın konferentsııada aıtyldy, dep habarlaıdy QazAqparat tilshisi.

«Oqýshylardy qashyqtan oqytýdyń besinshi tetigi – ınternet arqyly oqý. Qalada oqıtyn balalar sany – 2 mıllıon. Aýdan ortalyqtarynda oqıtyn oqýshylar sany 500 myńǵa jýyq. 2,5 mıllıon oqýshy ǵana ınternet arqyly oqıdy dep oılamaımyz. Jeliniń sapasy, kompıýterdiń ınternet jelisine qosylýy máselesi bar. Internet arqyly jumys isteý óte yńǵaıly bolady», - deıdi QR Bilim jáne ǵylym mınıstri Ashat Aımaǵambetov.

Ol osy tetik boıynsha jumys isteýge eki úlken kedergi bar ekenin aıtty.

«Birinshi – kompıýterdiń jetispeýshiligi. Ekinshi – eldi mekende tehnıkalyq múmkindik bolsa da, ol oqýshylardyń úıinde ınternetke qosylý múmkindigi joq. Osy másele boıynsha tıisti jumystar júrgizip jatyrmyz. Mektep balansyndaǵy kompıýterlerdi oqýshylarǵa ýaqytsha berdik. Qazirgi ýaqytqa deıin 120 myń kompıýter mektep balansynan ata-analarǵa berilip otyr. Ary qaraı da biz osy jumysty jalǵastyramyz. Elimiz boıynsha kompıýter sany jetkilikti. Ekinshiden, kompıýterdi qosymsha satyp alý múmkindigimiz bar. Jergilikti atqarýshy organdardyń usynysyna sáıkes, 79 870 kompıýter satyp alý týraly jospar bar. Oǵan tıisti qarjy bólindi. Tıisti satyp alý jumystary júrgizilip jatyr. Mysaly, Almaty qalasynda 10 myńǵa jýyq kompıýter osylaı qamtamasyz etildi. Osy jumys Nur-Sultan qalasynda belsendi júrgizilýde», - deıdi mınıstr.