Bilim mınıstri beınebaqylaý júıesindegi kemshilikterdi joıýdy tapsyrdy

NUR-SULTAN. QazAqparat - Elimizdiń bilim ordalaryndaǵy beınebaqylaý júıesinde bolǵan kemshilikter 2 aıdyń ishinde joıylýy tıis. Bul týraly Bilim jáne ǵylym mınıstri Ashat Aımaǵambetov, dep habarlaıdy QazAqparat tilshisi.

«Balabaqshada bolsyn, mektepte bolsyn, koledjde bolsyn beınebaqylaý qaýipsizdik úshin óte mańyzdy. Ótken jyly bilim oshaqtarynyń beınebaqylaýmen qamtylýy 75 paıyz bolsa, qazir 99 paıyzǵa jetti. Biraq, bizge sany emes, sapasy kerek», - dedi Ashat Aımaǵambetov mınıstrliktiń apparat keńesi barysynda.

Sondyqtan da ol Іshki ister jáne Bilim mınıstrlikteriniń buıryqtary shyqqanyn atap ótti.

«Osy qujatqa baılanysty naqty talaptar qoıylǵan. Beınebaqylaý júıeleri osy talaptarǵa saı bolýy kerek. Sol sebepti biz bul máseleni eki aıdan keıin, jeltoqsan aıynda qaraıtyn bolamyz. Eki aıdyń ishinde anyqtalǵan kemshilikterdi joıýdy tapsyramyn. Bul máseleni baqylaýda ustaýlaryńyz qajet dep sanaımyn», - dedi mınıstr.

Aıta keterligi, apparat keńesi barysynda QR Bilim jáne ǵylym mınıstrligi Bilim jáne ǵylym salasyndaǵy baqylaý komıtetiniń basshysy Gúlzat Kóbenova memlekettik 20 balabaqshada, 507 jekmenshik balabaqshada jáne72 mektepte beınebaqylaý júıesiniń joqtyǵyn, al keıbir mektepterde atalǵan júıe kemshiliktermen ornatylǵanyn aıtqan edi.