Bilim mınıstri bala quqyǵyn qorǵaý jónindegi óńirlik komıssııalardyń jumysyn synǵa aldy

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov kámeletke tolmaǵandardyń isi jáne olardyń quqyqtaryn qorǵaý jónindegi oblystyq jáne aýdandyq komıssııalardyń jumysyn synǵa aldy, dep habarlaıdy QazAqparat tilshisi.

«Vedomstvoaralyq komıssııa – barlyq memlekettik organnyń kúsh biriktirip, jumysyn úılestiretin basty ınstıtýt. Sondyqtan osy ınstıtýtqa biz basa mán beremiz. Densaýlyq saqtaý, bilim, ishki ister organdary qyzmetkerleri bir baǵytta jumysyn úılestire bilýge tıis. Biraq sol komıssııany (oblystyq jáne aýdandyq) – eleýsiz jumys organynyna, bilim basqarmasy nemese bólimine aınaldyryp jiberdik. Jumys josparyn qarasań, bári de bilimge qatysty dúnıeler. Turǵyn úı, balalardyń densaýlyǵy, skrınıng, áleýmettik qorǵaý máseleleri qaıda qaldy? Jumystyń bári bir baǵytta júrgizilip ketken. Munyń basty sebebi – sol komıssııalardyń hatshylary bilim basqarmalarynyń nemese bólimderiniń ókilderinen taǵaıyndalyp ketkeninde. Buǵan jol berýge bolmaıdy. Máselelerge jan-jaqty qaraý kerek», - dedi Ashat Aımaǵambetov.

Mınıstrlik búgingi kúni aýdandyq jáne oblystyq komıssııalardyń jumysyn teksergen.

«Bizdiń mamandar sondaǵy jumysty qashyqtan otyryp-aq baǵalaýǵa qaýqarly. Sol tekserý jumystarynyń qorytyndysy boıynsha osy eskertýlerdi jınaqtap otyrmyz», - dedi Ashat Aımaǵambetov.