Bilim mınıstri 1 myń jańa mektepti salý qadamdaryn túsindirdi

NUR-SULTAN. QazAqparat – Aldaǵy 4 jyl ishinde jyl saıyn 200 mektep salynatyn bolady. Bul týraly Memleket basshysynyń Joldaýynda berilgen tapsyrmalardy oryndaýǵa arnalǵan Úkimet otyrysynda Bilim jáne ǵylym mınıstri Ashat Aımaǵambetov málim etti, dep habarlaıdy QazAqaparat tilshisi.

«Prezıdenttiń tapsyrmalaryn júzege asyrý baǵyttaryna toqtalǵan mınıstr: «Birinshiden, 1000 jańa mektep qurylysy boıynsha atap óteıin. Boljamǵa sáıkes 2025 jyly ýrbanızatsııa men týý deńgeıiniń ósýine baılanysty mekepterde qosymsha 993 myń orynǵa qajettilik paıda bolady. Sondyqtan oryn tapshylyǵyn boldyrmaý úshin 1 myń jańa mektepti salý 4 negizgi mehanızm arqyly iske asyrylady: memlekettik bıýdjetten nysanaly qurylys, memlekettik-jekemenshik áriptestik tetigi, jekemenshik mektepter jelisin damytý, modýldik mektepter salý», - dedi.

Onyń aıtýynsha, josparǵa sáıkes bıylǵy jyldyń ózinde 200 jańa mektep iske qosylady. Kelesi 4 jyl ishinde jyl saıyn 200 mektep salynatyn bolady.

«Jergilikti atqarýshy organdar osy 1000 mektepti salý úshin qajetti jer ýchaskelerin aldyn-ala bólip, onyń ınteraktıvti kartasyn ázirleýi qajet. Oǵan qosa 1500, 2000, 2500, 3000 oqýshyǵa arnalǵan mektepterdiń zamanaýı tıptik jobalaryn daıyndaý kerek dep esepteımiz. Osy tapsyrmanyń oryndalýyna qoǵamdyq baqylaý júrgizý úshin arnaıy elektrondyq portal iske qosylady», - dedi mınıstr.

Eske salsaq, 1 qyrkúıek kúni QR Prezıdenti Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty halyqqa Joldaýyn jarııalady. Joldaýdyń tolyq mátini myna jerde.