Bilim men ǵylymdy reformalaý birer jylda óz nátıjesin beredi – QR Bilim berý isiniń úzdigi

NUR-SULTAN. QazAqparat – Bilim berý, ǵylym salasyndaǵy túıtkildi máseleler QR Prezıdenti Qasym-Jomart Toqaevtyń qatysýymen ótken Ulttyq qoǵamdyq senim keńesinde keńinen aıtyldy. QR Bilim berý isiniń úzdigi, sheber-pedagog Boranbaı Májenovtiń pikirinshe, Memleket basshysynyń bilim berý salasyn damytýǵa qatysty aıtqan tapsyrmalary óte ózekti, dep habarlaıdy QazAqparat tilshisi.

Boranbaı Májenov Nur-Sultan qalasyndaǵy №38 mektep-lıtseıde tarıh páninen sabaq beredi. Tájirıbeli ustazdyń pikirinshe, bilim berý salasyn reformalaýǵa qatysty máseleler qoǵamda kópten beri talqylanyp keledi. Eldiń bilim men ǵylym salasy myqty bolmaı, ekonomıkasy esh ýaqytta turaqty damı almaıdy.

«Qoǵamdyq keńes otyrysynda Prezıdentimiz sheshilýi qajet máselelerdi aıtyp ótti. Sonyń biri - synyptardaǵy oqýshylardyń sanyn azaıtý. Mysaly Nur-Sultan qalasyndaǵy mektepterdi alatyn bolsaq, qazaq mektepterine balalar syımaıdy. Bir synypta 38-40 baladan otyrǵandary bar. Máselen № 38 mektep 700 balaǵa arnalsa, shyn máninde onda 2,5 myń bala oqyp jatyr, eki aýysymmen. Osynyń ózi bilim sapasyna keri áser etetini túsinikti», - deıdi sheber-pedagog.

Onyń aıtýynsha, 2,5 myń balaǵa bir ǵana sport zaly bar. Dene shynyqtyrý sabaǵyna aptasyna 3 saǵat berilgen. Barlyq synyp bir sport zalynda jattyǵýǵa májbúr.

«Memlekettik baǵdarlama boıynsha 2025 jylǵa deıin elimizde 650 myń bala syıatyn 800 mekteptiń salynatyndyǵy aıtyldy. Aýyldaǵy tirek mektepterge 114 ınternat, 700-den astam sport zaly salynbaq eken. Oqýshylar sany jyldan-jylǵa artyp keledi. Sol sebepti jańa mektepterdiń qurylysy ózekti máseleni sheshpek», - deıdi Boranbaı Májenov.

Mektepterge basshylardy saılaýda da oılanarlyq másele bar. Pedagogtyń aıtýynsha, mektepte jas ustazdar óte kóp. Olar magıstratýra, doktorantýra bitirgen. Shetelde oqyp, tájirıbe jınaqtap kelgenderi de bar. Búginde olar qarapaıym muǵalim bolyp eńbek etip júr.

«Jastardyń alǵan bilimin, jınaǵan tájirıbesin nege paıdalanyp, basshylyq qyzmetterge qoımasqa, «jas kelse – iske» degen bar emes pe?!

Prezıdent dırektorlar arasynda rotatsııa jasap turý qajettigin de aıtty. Keı dırektorlar bir orynda 15-20 jyl otyrady. Myqty dırektorlardy aýystyryp otyrsa, olar óz tájirıbelerin basqa bilim ordalaryna engizer edi. Bul sybaılas jemqorlyqqa da jol bermes edi. Dırektorlar attestatsııadan úsh jylda bir ret ótip turýy kerek degen de durys sheshim», - deıdi bilim berý isiniń úzdigi.

Eńbek jolyn aýylda bastaǵan ustazǵa aýyl mektepterindegi jaǵdaı jaqsy tanys. Boranbaı Májenovtyń aıtýynsha, qala men aýyl mektepterinde aıyrmashylyq bar ekeni ras. Keı aýyldarda synyptar bos. Biraq bir muǵalim oqýshy sanynyń azdyǵynan túrli jastaǵy balalarǵa sabaqty qatar berýge májbúr. Al ol eńbekaqysynda esh eskerilmeıdi.

«Muǵalim mártebesin kóterýge baılanysty kóptegen ister qolǵa alynbaq. Eńbekaqysy áli de ósedi, jumys júktemesi azaıdy, túrli qaǵazbastylyqtan arylyp jatyr. Taǵy bir jaqsy jańalyq – muǵalimdikke oqyp jatqan stýdentterdiń stıpendııasyn basqalarǵa qaraǵanda 42 myń teńgege jetkizý, doktoranttardyń stıpendııasyn 150 myń teńgege deıin kóbeıtý máselesi. Josparlanǵan reforma júzege assa - munyń bári birer jylda óz nátıjesin bere bastaıdy», - deıdi Boranbaı Májenov.