Bilim men biliktilik bıikke bastaıdy

ASTANA. QazAqparat - Qazaqstan Respýblıkasynyń Premer-Mınıstri Kárim Másimov keshe jumys babyndaǵy saparmen Aqmola oblysyna keldi, dep jazady «Egemen Qazaqstan» gazeti.

Úkimet basshysy aldymen «Step­nogor Eýropa podshıpnık korporatsııa­sy» AQ óndiristik ýchaskelerin aralap, kásiporynnyń jańa baǵyttaǵy jumystarymen tanysty. Odan ke­ıin Stepnogor qalasyndaǵy №2 ındýs­trııalyq-tehnıkalyq kolledjinde jas­tarmen kezdesý ótkizip, dóńgelek ústel aýqymynda erkin pikir órbidi.

- Meni monoqala men oǵan irge­les aýyldar jastarynyń tynys-tirshiligi qyzyqtyrady, - dedi Kárim Qajymqanuly. - Sizder úshin basty másele mamandyq alyp, belsendi eńbekke aralasý bolyp tabylady. Memleket basshysynyń tapsyrmasymen jumysshy mamandyǵyn alý aqysyz negizde júr­giziledi. Stepnogor qalasynda «Qazaq altyn» JShS, Stepnogor Eýropa podşıpnık korporatsııasyna, Taý-ken metallýrgııa zaýytyna, Taý-ken jabdyqtary zaýytyna 4 kolledj kadr daıarlaıdy. Búgingi kúni munda 1186 stýdent dýaldy oqý júıesine tartylǵan.

Qoldanylyp jatqan sharalar ná­tı­jesinde Aqmola oblysynda jastardyń jumyssyzdyǵy 2010 jylǵy 5,6 paıyzdan 2015 jyly 3 paıyzǵa tómendedi. Bul respýblıkalyq deńgeıden joǵary. Áıtkenmen, aýyl jastarynyń mem­le­kettik qoldaý jónindegi aqparatqa qol jetkizýi, tıisti keńester alýy, bos ýaqytty tıimdi paıdalanýy baǵytynda jumysty shırata túsý qajet. Osy oraıda jastar resýrstyq ortalyqtarynyń qyzmet aýqymyn keńeıtý qajet.

Kezdesýde Aqmola oblysy ákiminiń orynbasary Nurlan Nurkenov habarlama jasasa, Shortandy aýdandyq «Jastar resýrstyq ortalyǵynyń» dırektory, aýdandyq máslıhattyń depýtaty Er­bolat Japarov,  «EPK-Stepnogor» AQ baqylaý-ólsheý quraldarynyń ret­teýshisi Lázzat Shúkirbaıqyzy, Sh.Ýálıhanov atyndaǵy Kókshetaý memlekettik ýnıversıtetiniń stýdenti Marǵulan Turmashev, №2 ındýstrııalyq-tehnıkalyq kolledjiniń oqýshysy Anastasııa Semenchenko Premer-Mı­nıstr kótergen máselelerge qatysty oı­laryn ortaǵa saldy.

Premer-Mınıstr ÚIID baǵdar­lamasymen jemisti jumys atqaryp kele jatqan «Qazaqstannyń jylyjaı tehnologııasy» JShS ónimderdi daıyndaý men ony ótkizý isimen tanysqan soń Býrabaı aýdanyna baǵyt aldy.

Aýdan ortalyǵy Şýche qalasyndaǵy «Mıras» mektep-gımnazııasynda pedagogter qaýymynyń qatysýymen bilim sala­syndaǵy kókeıkesti máselelerden ózek tartqan keńes ótkizildi.

- Elbasy bilim salasyna erekshe kóńil bólip keledi, - dedi Úkimet basshysy kirispe sózinde. - Osy baǵytta kóptegen jumystar atqarylýda. Men búgin elimizdegi ınternattardyń jaǵ­daıymen tanysýǵa arnaıy kelip otyrmyn. Óıtkeni, aýyl balalarynyń bilim sapasy kóbine osyndaı mektepterge baılanysty.

Budan keıin Aqmola oblysy ákiminiń orynbasary N.Nurkenov pen Bilim jáne ǵylym mınıstri E.Saǵadıevtiń keńeıtilgen habarlamalary tyńdaldy.

Premer-Mınıstr qorytyndy sózinde: «Men respýblıkalyq mártebesi bar mektep-ınternatta aýyl balalarymen birge oqydym. (Bul másele «Egemen Qazaqstan» gazetinde kóterilgen bolatyn - B.A.) Sondyqtan da bul másele maǵan jaqsy tanys. Osyndaı mektepterdiń damýy biz úshin óte mańyzdy. Barlyq oqý­shylardyń 48 paıyzy - aýyl mek­tebinde bilim alady. Sonyń ishinde, 55 myńǵa jýyq bala mektep-ınternat­tarda oqıdy. Olardyń arasynda daryndy balalar kóp. Sondyqtan, aýyl mektepterine, aýyl balalaryna jaǵdaı jasaý Elbasynyń basty nazarynda. Osy jumystardy atqarý úshin kelesi máselelerge kóńil bólýimiz kerek.

Birinshiden, ustazdyń bedelin, ınternat muǵalimderiniń mártebesin kóterý - bizdiń negizgi mindetimiz.

Ekinshiden, barlyq mektepterde ınfraqurylymdy damytyp, ın­te­raktıvti quraldar men ınternettiń bolýyn qamtamasyz etý qajet. Bul úshin tıisti qarjy bólinýde. Biz bul jumysty aýyl mektepterinen bastaımyz», - dedi Úkimet basshysy.

Sondaı-aq, ol alǵashqy ınteraktıvti qu­raldy «Mıras» ujymyna syıǵa tartty.

K.Másimov jumys kestesiniń ty­ǵyz­­dyǵyna qaramastan «Esil-Agro» JShS-niń egistik alqaptaryn aralap, serik­testiktiń taýarly-sút fermasynda boldy.

Úkimet basshysy sapary barysynda elimiz úshin asa mańyzdy eki máseleni qamtyǵan keńes ótkizdi.

Osy oraıda Kárim Qajymqanuly EAEO elderiniń Úkimet basshylaryna Odaq elderiniń et-sút ónimderine tehnıkalyq reglamentter daıyndaý máselesin qaraý jóninde resmı túrde usynys jarııalap, Aýyl sharýashylyǵy mınıstri Asqar Myrzahmetovke soǵan sáıkes úndeý daıyndaýdy tapsyrǵanyn atap kórsetti. Ol otandyq taýar óndirý­shilerdiń aýylsharýashylyq ónimderin ótkizýde mańyzdy ról atqarmaq.

«Astana aınalasyndaǵy azyq-túlik beldeýin damytý jáne aýyl sha­­­­rýa­­shylyǵy ónimderin ótkizý» ta­qy­­ry­byndaǵy májiliske aýdan ákim­deriniń orynbasarlary, oblystyq basqarmalardyń basshylary men iri taýar óndirýshiler qatysty. Munda Aqmola oblysy ákiminiń orynbasary Qadyrhan Otarov baıandama jasady.

Astana qalasynyń turǵyndaryn aýyl­sharýashylyq ónimderimen turaqty qamtamasyz etý maqsatynda oblystyń 17 aýdany belsendi jumys atqarýda. Bul ispen 128 kásiporyn aınalysady. Ónimder 28 bazarda, 29 saýda úıi men 10 saýda ortalyǵynda úzdiksiz satylýda. Al, elorda jármeńkesindegi baǵa 15-20 paıyzǵa tómen. Ústimizdegi jyldyń bes aıynda astanalyqtardyń dastarqanyna 5,6 myń tonna et jáne et ónimderi, 74,9 mıllıon dana jumyrtqa jetkizildi. Bul kórsetkishter ótken jyldyń sáıkes merzimimen salystyrǵanda anaǵurlym kóp. Bıylǵy jyl basynda Astana qalasy men Aqmola oblysynyń ákimdikteri arasynda azyq-túlik qaýipsizdigin qamtamasyz etý jónindegi memorandýmǵa qol qoıylýy maqsatty jumystyń baıandylyǵyn aıqyndaıdy.

Bul baǵyttaǵy júıeli jumys jemis­siz de emes. Mal basy barlyq túlik boıynsha ósip, asyldandyrý isine aıryqsha kóńil bólinýde. Memlekettik regıstr derekteri boıynsha asyl tuqymdy iri qaranyń sany 64,3 myń basqa jetip otyr. Bul ispen 30 sharýashylyq turaqty aınalysýda. Osy rette, 2010-2015 jyldary atalǵan sharýashylyqtarǵa sheteldik 14 myń bas mal jetkizilip, respýblıkalyq kórsetkishtiń úshten birin quraǵanyn aıtýǵa bolady. Astanalyq oblystyń eksporttyq áleýetiniń artýyn osy jaǵdaılarmen de baılanystyrǵan jón.

Úkimet basshysy, sondaı-aq, Bý­rabaıda Şýche-Býrabaı kýrortty aımaǵyn damytý máselesi jóninde keńes ótkizip, onda oblys ákimi S.Kýlagın bastaǵan quzyrly organdar ókilderiniń kún tártibinde qaralǵan máselege qatysty esepteri tyńdaldy.

Búginde munda kýrortty aımaqty damytýdyń birinshi jáne ekinshi kezeń­deriniń jumystary atqarylýda. Sonymen birge, oblysqa osy turǵyda 25 is-sharany júzege asyrý tapsyrylǵan bolatyn. Olardyń jeteýi keler jyly Astanada ótetin EKSPO kórmesine qa­tysty. Qazirgi kezde atalǵan is-sha­ralardyń da birnesheýi júzege asyrylýda.

- Şýche-Býrabaı kýrortty aımaǵyn damytý Elbasynyń turaqty nazarynda. Sondyqtan Prezıdent tapsyrmalary tııanaqty oryndalýy tıis, - dep atap ótti K.Másimov keńesti qorytyndylaı kele.

Baqbergen AMALBEK