Bilim grantyn taǵaıyndaý komıssııasy óz jumysyn aıaqtady

ASTANA. QazAqparat - Búgin memlekettik bilim granttaryn taǵaıyndaý jónindegi respýblıkalyq komıssııa óz jumysyn aıaqtady, dep habarlaıdy QazAqparat.

Komıssııa quramyndaǵy bilikti de kásibı áleýeti joǵary túrli sala sarapshylary tabandy eńbek etip, aýqymdy jumys jasaı bildi.

Osy rette bıylǵy komıssııa sapynda Parlament depýtattary, memlekettik organdar men bilim salasy kásipodaqtarynyń jetekshileri jáne «Atameken» ulttyq kásipkerler palatasynyń, joǵarǵy oqý oryndary qaýymdastyǵynyń, qoǵamdyq uıymdardyń ókilderi boldy.

Endi talapkerlerdiń UBT-da jınaǵan baldaryna jáne bekitilgen erejelerge sáıkes konkýrstyq negizde bilim granttary taǵaıyndalady.

«Sapaly jáne qajyrly qyzmeti úshin komıssııa múshelerine sheksiz alǵysymdy bildiremin. Bıyl bilim grantyn taǵaıyndaý konkýrsyna qatysýǵa 94 myńnan astam ótinim berildi. Talapkerlerdiń basym bóliginiń tańdaýy «Pedagogıkalyq ǵylymdar», «Injenerlik, óńdeý jáne qurylys salalary» jáne «Aqparattyq-kommýnıkatsııalyq tehnologııalar» baǵyttaryndaǵy mamandyqtarǵa tústi», - dep málimdedi Ǵylym jáne joǵary bilim mınıstri Saıasat Nurbek.

Konkýrstyq irikteýdiń qorytyndysy Ǵylym jáne joǵary bilim mınıstrliginiń ınternet resýrsynda, Telegram arnasynda jáne vedomstvonyń áleýmettik jelidegi resmı paraqshalarynda 10 tamyzǵa deıin jarııalanady.

Al joǵary oqý oryndaryna qujat qabyldaý 25 tamyzda aıaqtalady.