Bilim granty: Elimizde qandaı kvotalar qarastyrylǵan

NUR-SULTAN. QazAqparat – Halyqtyń áleýmettik osal toptaryna bólinetin bilim granttarynyń sany kóbeıtildi. Bul týraly Ǵylym jáne joǵary bilim mınıstriliginiń baspasóz qyzmetinen málim boldy, dep habarlaıdy QazAqparat tilshisi.

«Kámeletke tolmaǵan tórt jáne odan kóp bala tárbıelep otyrǵan otbasylardaǵy balalar úshin granttardyń jalpy sanynyń 5 paıyzy qarastyrylǵan.

Keminde úsh jyl tolyq emes otbasy mártebesi bar otbasylardan shyqqan balalarǵa - 1 paıyzy, sondaı-aq І, ІІ toptaǵy múgedek balalardy tárbıelep otyrǵan otbasylardan shyqqan túlekterge bilim berý granttarynyń 1 paıyzy kózdelgen», - delingen mınıstrlik málimetinde.

Sonymen qatar aýyl jastary arasynan shyqqan azamattar úshin aýyldardyń áleýmettik-ekonomıkalyq damýyn aıqyndaıtyn mamandyqtarǵa jáne Qazaqstan azamattary bolyp sanalmaıtyn ulty qazaq adamdarǵa kvota qarastyrylǵan.

«Jetim balalar jáne ata-anasynyń qamqorlyǵynsyz qalǵan balalar men I, II toptaǵy múgedektigi barlar, bala kezinen múgedekter, múgedek balalar arasynan shyqqan azamattar úshin kvota granttar sanynyń 1 paıyzyn quraıdy», - dep atalyp ótken vedomstvo habarlamasynda.

Budan buryn jazǵanymyzdaı, bıyl 80 myńǵa jýyq talapker bilim granttaryn taǵaıyndaý konkýrsyna qatysýǵa ótinish berdi.