Bilim berý salasyndaǵy eń joǵary jalaqy qaı óńirde

NUR-SULTAN. QazAqparat – Bilim berý salasynda eń joǵary jalaqyny elorda mamandary alyp júr, dep habarlaıdy QazAqparat ranking.kz saıtyna silteme jasap.

«Bıylǵy ekinshi toqsanda bilim salasyndaǵy ortasha aılyq ataýly jalaqy 293,3 myń teńgege jetip, bir jyl burynǵy deńgeıden 25,4 paıyzǵa joǵary boldy», - delingen ranking málimetinde.

Osy oraıda ınflıatsııany eskere otyryp, saladaǵy qyzmetkerlerdiń taýar satyp alý múmkindigi 10,1 paıyzǵa ósti.

Salystyrmaly túrde alyp qarasaq, el boıynsha ortasha ataýly jalaqy 312 myń teńgeni qurady.

Óńirler boıynsha alyp qaraǵanda, bilim salasyndaǵy joǵary jalaqyny elordadaǵy qyzmetkerler alyp júr. Bul turǵyda 414 myń teńge somasynda jalaqy tirkelip, bul kórsetkish bir jyl burynǵy deńgeıden 18 paıyzǵa artyq.

Nur-Sultan qalasyndaǵy jalaqy el boıynsha ortasha deńgeıden 41,1 paıyzǵa joǵary. Osy oraıda ekinshi orynda Almaty qalasy (335,7 myń teńge, 26,4 paıyz ósim), al úshinshi orynda Mańǵystaý oblysy (326,2 myń teńge, 21,7 paıyz ósim) tur.

Saladaǵy eń tómen jalaqy mektepke deıingi bilim berý baǵytynda baıqalyp otyr. Bul sektorda ortasha kórsetkish 147,3 myń teńge bolyp, jyldyq ósim 11,2 paıyzdy qurady. Bastaýysh bilim segmentinde ataýly jalaqy 243,5 myń teńgege, orta bilimde 343,5 myń teńgege, joǵary bilimde 323,1 myń teńgege jetti.

20 óńirdiń altaýynda ǵana saladaǵy jalaqy el boıynsha ortasha deńgeıden joǵary ekeni anyqtaldy.

Bıyldyń ekinshi toqsanynda bilim salasynda qyzmet etip júrgenderdiń sany 1,1 mln adamdy qurap, bir jyl burynǵy kórsetkishten 1,4 paıyzǵa artyq boldy.

Osy oraıda eń kóp maman Túrkistan oblysynda tirkeldi, ıaǵnı bul óńirde 144,5 myń adam jumys istep júr. Bir jylda olardyń sany 1,3 paıyzǵa ósti. Top-3 qataryna Almaty (99 myń adam, plıýs 2,7 paıyz) men Almaty oblysy (80,6 myń adam, mınýs 37 paıyz) endi.

Bul salada qyzmet etip júrgenderdiń eń az sany Ultytaý oblysynda tirkeldi, ıaǵnı 14,4 myń adam qamtylǵan.