Bilim berý qyzmetine lıtsenzııa almaǵany úshin 32 mektepke aıyppul salyndy

ASTANA. QazAqparat - Bilim berý salasyndaǵy sapany qamtamasyz etý komıteti bilim berý uıymdaryna monıtorıng jasap, 40 mekteptiń lıtsenzııasyz jumys istegenin anyqtady. Onyń ishinde 30 memlekettik jáne 10 jekemenshik mektep bar, dep habarlaıdy QR Oqý-aǵartý mınıstrliginiń baspasóz qyzmeti.

Lıtsenzııasyz jumys istegen mektepterdiń deni Astana, Almaty qalalary men Batys Qazaqstan, Almaty, Jambyl, Jetisý jáne Mańǵystaý oblystarynda. 32 mektepke qatysty ákimshilik is qozǵalyp, lıtsenzııasyz qyzmet úshin aıyppul salyndy. Onyń 23-i memlekettik, 9-y jekemenshik mektep.

«Lıtsenzııanyń joqtyǵy mekteptiń sáıkestik tekserýinen ótpegenin nemese ruqsat alý úshin qujattar tapsyrmaǵanyn bildiredi.Onnan asa mektepte sanıtarlyq-epıdemıologııalyq qorytyndy jáne tótenshe jaǵdaı aktileri joq. Bul balalardyń densaýlyǵy men jaılylyǵyna qaýip týdyrýy múmkin.14 mektepte materıaldyq-tehnıkalyq baza bilim berýdiń zamanaýı talaptaryna saı kelmeıdi, bilim berý ınfraqurylymy, bilikti pedagogıkalyq kadrlarmen tolyq jabdyqtalmaǵan, uıymdastyrý jumystary da durys jolǵa qoıylmaǵan bul bilim berý sapasyn keri áserin tıgizedi», - dedi komıtettiń ruqsat berý saıasaty basqarmasynyń basshysy Juldyz Áýezhanova.

Aıta keteıik, lıtsenzııasy joq mektepter bilim týraly memlekettik úlgidegi qujattardy, ıaǵnı negizgi jáne jalpy orta bilim týraly attestattardy bere almaıdy. Lıtsenzııasyz jumys isteıtin barlyq mektepterge qatysty ákimshilik ister qozǵaldy. Búgingi tańda aýmaqtyq departamentterge lıtsenzııasy joq mektepterge qatysty tıisti sharalar qabyldaý tapsyryldy, óńirlerdiń ákimdikterine tıisti hattar joldandy.