Bilim baǵdarlamalarynyń 60% kásibı standarttarǵa saı jańartyldy – vıtse-mınıstr
Ortalyq kommýnıkatsııalar qyzmetinde bolǵan brıfıngte Ǵylym jáne joǵary bilim vıtse-mınıstri Qýanysh Erǵalıev osylaı málimdedi, dep habarlaıdy QazAqparat tilshisi.
«Bilim berý baǵdarlamalary kásibı, aımaqtyq standarttar men atlastarǵa negizdelgen. Bilim berý baǵdarlamalarynyń 64 paıyzy kásibı standarttardy eskere otyryp jańartyldy. Búginde ýnıversıtetter eńbek naryǵynda talap etiletin daǵdylardy qalyptastyrý úshin ınnovatsııalyq jáne pánaralyq bilim berý baǵdarlamalaryn ázirledi.
Joǵary bilim berý júıesi men eńbek naryǵyn odan ári jaqyndastyrý úshin aldyn-ala boljam jasaıtyn kadrlar júıesin engizý josparlanýda. Aımaqtyq ýnıversıtetter ákimshilikpen jáne jergilikti korporatıvti sektormen tyǵyz baılanysady. Osylaısha, aımaqtyq ýnıversıtetter ár aımaqtyń ekonomıkasy úshin jergilikti ósý núktelerine aınalady. Jalpy, bilim berýdi damytýǵa eki teń tarap – jumys berýshiler men akademııalyq qaýymdastyq qatysýy kerek.
Bul júıe qajetti bilim men daǵdyǵa ıe kadrlardy daıyndaý úshin boljaý zertteýlerin qamtamasyz etetin «Mamandyǵym-bolashaǵym» baǵdarlamasynyń negizi bolady. Ýnıversıtetterge óz bilim berý baǵdarlamalaryn damytýǵa múmkindik berilgen», - dedi Qýanysh Erǵalıev.
Onyń aıtýynsha, taıaýda engizilgen ózgeristerge saı, endi ýnıversıtetterge bilim berý baǵdarlamalary men olardyń mazmunyn anyqtaý isinde erkindik beriledi.