Biliktiligi tómen sýdıalar úshin sotqa jol jabyq - Joǵarǵy sot

NUR-SULTAN. QazAqparat - Sottarda sýdıalar júktemesi azaıyp keledi. Bul týraly elordada QR Prezıdenti Qasym-Jomart Toqaevtyń tóraǵalyǵymen ótip jatqan Sheteldik ınvestorlar keńesiniń 32-shi jalpy otyrysynda Joǵarǵy sot tóraǵasy Jaqyp Asanov málim etti, dep habarlaıdy QazAqparat.

"2019 jyldyń qańtarynan eńbekaqy (sýdıalardyń) eleýli túrde artty. Ásirese, qarap jatqan isteri qıyn ári jumys kólemi aýqymdy adamdardyń eńbekaqysy ósti. Ekinshiden, daý-damaı joq isterden bosatyp jatyrmyz. Bıylǵy mamyrdan bastap 10 jylda alǵash ret sot júktemesi qysqaryp keledi", - dedi Jaqyp Asanov

Onyń sózine qaraǵanda, atqarylyp jatqan tyń qadamdardyń biri HR menedjment tetikterimen sýdıalardy irikteýdiń jańa júıesin júzege asyrý bolǵanyn atap ótti.

"Bul óz kezeginde bastapqydan qatań tosqaýyldy qoıady, ıaǵnı bıyldan álsiz sýdıalar úshin sotqa jol jabyq boldy. Sonymen qatar, Joǵarǵy sot keńesi úlken ról atqarady", - dedi ol.

Osy oraıda J. Asanov zııatkerlik jáne monopolııalyq quqyq, salyq, jer qoınaýyn paıdalaný, ekologııa salasyndaǵy bilikti zańgerlerdi sýdıalyq qyzmetke shaqyrdy.

Onyń sózine qaraǵanda, eger de qyzmettegi sýdıanyń biliktiligi tómen bolsa, etıka boıynsha problemasy baıqalsa nemese sybaılas jemqorlyqqa jaqyn bolsa, onda jańa júıe boıynsha ol adam bul qyzmette otyra almaıdy.

"Uqsas ister boıynsha ártúrli sheshimder shyǵarylyp jatady dep bizge syn aıtylady. Anyq emes zań normalary saldarynan árqaısysy ony ózinshe túsinedi. Al kóptegen naqty jaǵdaılar boıynsha zańnamada tıisti jaýapty tabý qıyn. Sondyqtan Joǵarǵy sot "Atameken" UKP-men birlese vedomstvoaralyq 5 topty qurdy. Onyń maqsaty - salyq, jer, jer qoınaýyn paıdalaný jáne basqa da máseleler boıynsha biryńǵaı tájirıbeni qalyptastyrý", - dedi Jaqyp Asanov.