Bılik tarmaqtarynyń ókilettigin qaıta bólý - qoǵamdy demokratııalandyrýdaǵy mańyzdy sheshim - Ǵosman Tóleǵul
Onyń aıtýynsha, Elbasymyz bılik ókilettikterin bólisý reformasy arqyly memleket damýynyń kelesi belesine jol ashyp berdi.
«Táýelsizdigimizdi alǵan alǵashqy jyldarda memlekettigimizdi qalyptastyrý úshin bılikti ortalyqtandyrý qajet bolǵan edi. Qazaqstan qazir álem moıyndaǵan, ekonomıkasy órkendep, áleýmettik, saıası jaǵynan qalyptasqan irgeli el bolyp otyr. Endigi arada demokratııa úrdisterine oraı, bılikti bóle atqarý baǵytynda birqatar jumystar júrgizilmek», deıdi keıipkerimiz.
Sonymen qatar, ol bul eń aldymen Ata Zańymyzdaǵy keıbir baptardy ózgertý arqyly Parlament pen Úkimet quzyretin keńeıtý sharalarynan kórinis tabatynyn da aıtýda.
«Buryn Prezıdent quzyrynda bolǵan qyryqtan astam mindetter Parlament pen Úkimetke beriletin bolady. Osyǵan oraı, Parlamenttiń Úkimet quramyn jasaqtap, bekitýdegi róli arta túspek. Sot jáne prokýratýra organdary júıesinde de biraz ózgerister bolady dep kútilýde. Jergilikti atqarýshy organdar men ózin-ózi basqarý júıesine qatysty da oń ózgerister jasalatyn bolady. Rasynda da bizge bedeldi Parlament, halyqqa esep berip otyratyn Úkimet kerek. Sol sebepti, saıası reforma eń aldymen halyqtyń talqylaýyna usynylyp otyrǵany quptarlyq.
Osy oraıda, jergilikti jerlerde Elbasy Úndeýin halyqqa jetkizý, ony túsindirý jumystaryna halyq Assambleıasy belsendileri men ulttyq etnomádenı ortalyqtar, ardagerler, basqa da qoǵamdyq uıymdar belsene atsalysýy qajet. Ózim jetekshilik etetin Aqmola oblystyq ardagerler keńesi bul turǵyda belsendilik tanytady», - deıdi Ǵ.Tóleǵul.