Bılik pen Qazaqstannyń tutynýshylar lıgasy azamattar quqyǵyn birlesip qorǵamaq

ASTANA. 15 naýryz. QazAqparat - Búgin QR Indýstrııa jáne jańa tehnologııalar mınıstrligi men Qazaqstannyń tutynýshylar lıgasy arasynda satylatyn taýarlardy baqylaý jáne qaýipsizdik salasyndaǵy yntymaqtastyq máseleleri boıynsha ózaratúsinistik memorandýmyna qol qoıyldy.

Tutynýshylar quqyn qorǵaýdyń dúnıejúzilik kúni aıasynda rásimdelgen qujatqa mınıstrlik tarapynan QR Indýstrııa jáne jańa tehnologııalar vıtse-mınıstri Qanysh Tileýshın, al lıga tarapynan QR Parlamenti Májilisiniń depýtaty Qazaqstan tutynýshylar lıgasynyń prezıdenti Svetlana Romanovskaıa qol qoıdy.

Memorandýmǵa sáıkes mınıstrlik lıga tarapynan túsken tutynýshylar quqynyń buzylýy týraly derekterdi qaperge alady, satýshylar, jetkizýshiler, óndirýshiler arasynda tutynýshylardyń quqyǵyn saqtaý qajettigin túsindirý jumystarymen aınalysady. Sondaı-aq, tehnıkalyq retteý jáne ólshem birligin qamtamasyz etý salasyndaǵy quqyqtyq aktilerde ázirleý isine lıga qyzmetkerlerin tartatyn bolady. Óz kezeginde lıga tutynýshylardyń quqyqtarynyń buzylýy týraly aqparattardy mınıstrlikke berý múmkindikterin qarastyrady. Zań buzylýshylyqtardyń aldyn alýǵa baǵyttalǵan usynystardy ázirlep, mınıstrlikke jiberedi.

Sondaı-aq, turǵyndarǵa quqyqtyq kómek kórsetedi.