Bılik organdary áleýmettik-ekonomıkalyq máselelerdi sheshýge burynǵydan da basa mán berýi kerek – Máýlen Áshimbaev
«Búgin Memleket basshysy Qasym-Jomart Toqaevtyń tóraǵalyǵymen elimizdiń áleýmettik-ekonomıkalyq damý máseleleri jóninde keńeıtilgen keńes ótti. Jıyn barysynda Prezıdentimiz jýyrda ótken Májilis jáne máslıhattar saılaýy saıası reformalardyń mańyzdy kezeńi bolǵanyn aıtty. Osylaısha, bılik tarmaqtarynyń tepe-teńdigi ornyqty. Endi Parlament, jańadan jasaqtalǵan Úkimet, ákimder jáne barlyq bılik organdary áleýmettik-ekonomıkalyq saladaǵy máselelerdi sheshýge burynǵydan da basa mán berýi kerek», - dedi Senat tóraǵasy.
M. Áshimbaev Prezıdenttiń bul baǵyttaǵy birqatar basymdyqty belgilep bergenin, áleýmettik-ekonomıkalyq saıasat eń aldymen azamattardyń ómir súrý sapasyn arttyrýǵa baǵyttalýy qajettigin aıtty.
«Búginde bul máselede ınflıatsııa basty kedergi bolyp otyr. Soǵan baılanysty Prezıdent ınflıatsııanyń monetarlyq jáne monetarlyq emes faktorlarynyń áserin azaıtýdy tapsyrdy. Bul rette kúndelikti taýarlardyń qymbattaýy ózekti másele ekeni belgili. Onyń sebebin anyqtaý úshin óndiristen satylymǵa deıingi barlyq tizbekti jan-jaqty qaraý qajet. Sondaı-aq Memleket basshysy baǵanyń kúrt ósýimen kúresý úshin turaqtandyrý qorlaryn tıimdi paıdalanýdy, aýyl sharýashylyǵy ónimderin saqtaý jáne ótkizý boıynsha zamanaýı ınfraqurylym qurý jumystaryn jedeldetýdi tapsyrdy», - dedi ol.
Onyń aıtýynsha, barlyq ekonomıkalyq saıasat ekonomıkany ártaraptandyrýǵa jáne oqshaýlaýdy udaıy arttyra otyryp otandyq óndiristi damytýǵa basymdyq berýi qajet.
«Prezıdent atap ótkendeı, elimizdi ındýstrııalandyrý saıasaty naqty ári shynaıy júrgizilýge tıis. Ol úshin otandyq bankterdi ulttyq ekonomıka men óndiristerge kredıt berýge jumyldyrý, bıznes pen ınvestıtsııalar úshin qolaıly jaǵdaılar jasaý óte mańyzdy. Oǵan qosa, elimizge áleýmettik-ekonomıkalyq damýdyń negizi bolatyn jańa Salyq saıasaty kerek. Ol qosylǵan quny joǵary ónim óndirisine salynatyn ınvestıtsııalardy qoldaýǵa jáne tehnologııalyq eksportty yntalandyrýǵa baǵyttalǵany jón», - deıdi M. Áshimbaev.
Ekonomıkalyq ósýdiń taǵy bir mańyzdy sharty – energetıkalyq jáne ınjenerlik ınfraqurylymdy jańǵyrtý. Osyǵan oraı Memleket basshysy Úkimetke «Investıtsııa ornyna tarıf» jańa tarıftik saıasatyna kóshýdi tapsyrǵan.
«Búgingi keńeste Prezıdent aýyl turǵyndarynyń tabysy men turmys sapasyn arttyrý máselelerin de erekshe baqylaý kerektigin aıtty. Bul rette ekonomıkalyq saıasatty iske asyrý jáne ınvestıtsııalar tartý úshin ákimderge zor jaýapkershilik júkteledi. Sondaı-aq jergilikti ózin-ózi basqarý áleýetin de tıimdi paıdalaný qajet. Keńeske oblystyq jáne aýdandyq máslıhat tóraǵalarynyń qatysýy – osy baǵyttaǵy mańyzdy qadam.
Senat – birinshi kezekte, óńirlerdiń múddesin qorǵaıtyn palata. Sondyqtan aldaǵy ýaqytta mańyzdy áleýmettik-ekonomıkalyq máselelerdi sheshý jáne halyqtyń ómir súrý sapasyn arttyrý úshin Úkimetpen, ákimdermen jáne máslıhattarmen birlesken jumysymyzdy belsendi túrde jalǵastyra beremiz», - dedi Máýlen Áshimbaev.