Bılik ókilettilikterin qaıta bólýdiń nátıjesinde Úkimettiń jaýapkershiligi qalaı ózgeredi
Onyń aıtýynsha, qazirgi kezde memlekettik baǵdarlamalardy oryndaý boıynsha naqty mindettemeler bar. Soǵan sáıkes, ol mindetterdi oryndamaǵan memlekettik qyzmetkerler tártiptik jaýapkershilikke tartylady. "Sosyn qazirgi kezde árbir memlekettik baǵdarlamany Prezıdenttiń ózi bekitedi. Al ony oryndaıtyn - atqarýshy organdar. Baǵdarlamany Memleket basshysy bekitkennen keıin ol organdar qandaı da bir ózgeristerdi engizý, belgili bir mindetterdi oryndaý merzimin shegerý jáne taǵy basqa sebeptermen xattardy qarsha boratyp otyrady. Sóıtip, tıisti jumystardyń oryndalmaıtynyn aldyn ala eskertkendeı bolyp, jaýapkershilikten taıqyp turady. Ondaıda jaýapkershilikti artýdyń ózi qıynǵa túsedi. Endi, ondaı bolmaıdy. Úkimet memlekettik baǵdarlamany ózi bekitedi de, ózi soǵan jaýap beretin bolady. Hatpen jaýapkershilikten jaltarý da bolmaıdy. Máselen, naqty bir memlekettik baǵdarlamanyń ataýy jazylsa, sonyń janynda jaýapty adamnyń aty-jóni kórsetiledi", - dedi Baımoldına otyrystan keıingi brıfıngte.
Degenmen, ádilet vıtse-mınıstri qıt etse, bárin bastyqqa jaba salýǵa úzildi-kesildi qarsy. Onyń oıynsha, belgili bir qujattyń oryndalýy úshin jaýapkershilik sol qujatpen aınalysqan mamandarǵa júktelýi tıis. Al birinshi basshy strategııalyq jumyspen aınalysýy qajet. Alaıda Eýropa elderindegi osy ispetti tájirıbeni engizý úshin áli de ýaqyt kerek. Eń bastysy, sarapshy mamandardyń jaýapkershiligine saı keletin jalaqy tólenýi shart.
"Máselen, men óz departamentinde isteıtin sarapshynyń 450 myń teńge alǵanyn qalaımyn. Sebebi ol kóptegen normatıvtik-quqyqtyq aktilerge saraptama jasaıdy. Ol úshin myqty bilim kerek. Qazir jańadan kelgen sarapshy 70-80-aq myń teńge alyp jú r", - deıdi Baımoldına.