Bılik - eń úlken ıllıýzııa
Jetistikke kez kelgen tulǵa jetpeıdi. Másele sonda. Jigerińdi shyńdaýdyń tásili kóp bolǵanymen, onyń barlyǵy shynaıy ómirdegi júıede iske asa bermeıdi. Ótimsiz. Yqpaly joq. Bos ıllıýzııa.
Bári yqpaldylyqtyń eń joǵarǵy núktesin alǵysy keledi. Árkim óz múmkindigin synap kóredi. Tirshilikke beıimdilik úlken tájirıbeni talap etedi. Óziń jeke ómirińde toqyrap júrip, ózgelerge úlgi bolý múmkin emes. Oǵan qurǵaq teorııalar da kómektespeıdi. Bılikke kezdeısoq adamdar da kelmeıdi.
Basqalarǵa yqpalyńdy júrgizý ońaı emes. Basqarýdyń eń basty núktesi - óz sezimiń men aqyl parasatyńdy basty maqsatyńa qazyqtaı bilý. Qabilet-qarymyńnyń masshtaby osy jolda aıqyndalady.
Jigeriń jasyq bolsa, ony júz trenıngte shyńdaı almaıdy. Qadamyń batyl bolsa, jolyńdaǵy júz kedergi de seni toqtata almaıdy. Basty qupııa da osynda. Osyny fılm óz tilinde jatyq túsindiredi.
Qoǵamdaǵy saıqymazaq oıyndar. Fılmde onyń tabıǵaty men tili anaıy. Basqasha ashyp, jetkizý múmkin emes. Sebebi, onyń bolmysy tunǵan - azǵyndaý. Bul osy dáýirdiń basynan ótkerip jatqan úderisi. Aqıqaty. Tańdaýy.
Ata-anasy bilim jolynda oqýda dep úmit kútken qyzdarynyń beınesi. Áleýmettiń belgili bir ortasy men dárejesindegi jaýapkershiligin kóterip júr dep sengen er-azamattardyń is-áreketiniń kórinisi. Bul taqyryp ýaqytynda zerttelýi tıisti qajettilik.
Bul fılm - búgingi qoǵamnyń óresiniń aınasy. Rejısserdiń osy taqyryp tóńiregindegi izdenisi. Ózindik tili. Dúnıetanymynyń aşy úni.
Trenıngtiń basty maqsaty - adam sanasyn jaýlaý. Yqpaldylyqqa úıretý. Jigerin shyńdaý. Belgili bir maqsat jolyndaǵy aǵartýshylyq óner. Qarjy kózi. Barlyq joly aıqyndalǵan ómirdiń zańdaryn qaıta bir saraptaý. Zamanǵa beıimdeý. Nasıhattaý.
Fılmdegi basty keıipker Qanatqa kýrstasy Danııar naǵyz óz ortasynyń aqıqatyna janasatyn sabaq beredi. Darvınniń ilimimen aıtqanda, óz ortańnyń tirshilik tártibine qaraı is-áreketińdi de beıimdeý. Árkim óz isine jaýapty. Árkim óz kúnásin ózi kóteredi. Álsizder óz tańdaýymen, ózine tym senimdiler óz jolymen júredi. Bul fılmniń basty pálsapasy.
Sheshim jasaıtyn oı mynada. Barlyǵy bılikke jetsem deıdi. Yqpaldylyq. Dáreje. Mánsap. Aqsha. Erkindik. Barlyǵynyń kózdegeni osynda. Sol deńgeıdi alsam, barlyǵy ózgeredi dep kútedi. Qııalyndaǵy aqıqatyna senedi. Biraq, bıliktiń barlyq kúshi sonda ma?!
Bıliktegi kóp shendilerdiń jınaqtalǵan beınesi fılmde rejısserdiń qabyldaýynda búgingi aqıqatpen janasatyndaı deńgeıde ashylǵan. Biraq, basty kilt bul emes. Joǵarǵy bılik - kópshiliktiń paıymynda minsiz úlgilerge negizdeledi. Barlyǵy ózine úlgi izdeıdi. Úlgini minsiz deıdi. Biraq, bul fılm ómirde barlyq qalyptasqan paıymdar men qaǵıdalardyń búgingi qateligin ashyp kórsetedi. Bári biz oılaǵandaı emes.
Shekteýli orta. Olar basqarýdyń barlyq joly men tetigin biledi. Іs júzinde áreketiniń naqty nátıjesin kóredi. Qalǵanynyń kóbi sol bıliktiń elesine senedi. Trenıngterden ótedi. Kóbirek jigerimdi shyńdasam, qııalyndaǵy qalaýynyń bárine jetemin dep senedi. Kúsh-jigerińdi qansha márte trenıngten ótkizseń de, onyń tujyrymdary keı júıege júzege asyrýǵa kelmeıdi. Bul fılmniń ashqan basty aqıqaty men mazmuny da osynda.
Avtory: Gúlzat KÓBEK
Kınotanýshy, Ónertaný PhD doktory
Foto: brod.kz, aikyn.kz